شۋدا ءتارتىپ ساقشىلارىن جابىلا ۇرعانداردىڭ اراسىندا قىزدار دا بار

كۇش قولدانعان 13 ادام پوليسياعا جەتكىزىلدى

شۋ اۋدانىندا پوليسيا قىزمەتكەرلەرىنە قارسى كۇش قولدانعان 13 ادام پوليسياعا جەتكىزىلدى. ولاردىڭ اراسىندا 2 قىز دا بار، دەپ حابارلايدى Almaty-akshamy.kz قازاقپارات-قا سىلتەمە جاساپ.
اعىمداعى جىلدىڭ 7 مامىرىنا قاراعان ءتۇنى جامبىل وبلىسى شۋ اۋدانىنىڭ پوليسيا بولىمىنە ءبىر توپ ادامنىڭ پوليسيا قىزمەتكەرلەرىنە قاتىستى كۇش قولدانعانى تۋرالى حابارلاما كەلىپ تۇسكەن. شۋ قالاسىنىڭ كولىك بەكەتى ماڭىنداعى الاڭقاي جانىندا پاترۋلدىك پوليسيا قىزمەتكەرلەرى «ۆاز-21014» ماركالى اۆتوكولىگىن الدىڭعى جاعىندا مەملەكەتتىك ءنومىرى بولماعاندىقتان توقتاتقانى انىقتالدى. ءمان-جايدى انىقتاۋ بارىسىندا اۆتوماشينانىڭ جۇرگىزۋشىسى مەن جولاۋشىلارى زاڭدى تالاپتارعا باعىنباي، باسقا دا تانىس ادامدارىمەن بىرلەسىپ، بيلىك وكىلدەرىنە قارسىلىق كورسەتكەن. «ق ر قك 380-بابىنىڭ 3-بولىگى (بيلىك وكىلدەرىنە كۇش قولدانۋ) بويىنشا سوتقا دەيىنگى تەرگەۋ امالدارى باستالدى. شۋ اۋدانىنىڭ پوليسيا بولىمىنە 13 ادام، ونىڭ ىشىندە 2 قىز جەتكىزىلدى. قاقتىعىستىڭ 8 بەلسەندى قاتىسۋشىسى ۇستالدى، 6 ادامعا «كۇزەتپەن ۇستاۋ» تۇرىندەگى بۇلتارتپاۋ شاراسى تاڭدالدى، ال قىزدارعا قاتىستى ءۇي قاماعىنا الۋعا سانكسيا بەرىلدى»،-دەلىنگەن پوليسيا دەپارتامەنتى باسپا ءسوز قىزمەتىنىڭ حابارلاماسىندا. ۆەدومستۆو حابارلاماسىندا قىلمىستىڭ تاعى ءبىر بەلسەندى قاتىسۋشىسىنا قاتىستى «قاماۋدا ۇستاۋ» تۇرىندەگى بۇلتارتپاۋ شاراسىمەن ىزدەۋ جاريالانعاندىعى ايتىلعان. قازىرگى ۋاقىتتا پوليسەيلەردىڭ دەنساۋلىعىنا زيان كەلتىرۋ دارەجەسىن انىقتاۋ ماقساتىندا سوت-مەديسينالىق ساراپتاماسى تاعايىندالعان.