اڭ دا اڭقاۋ ەمەس
بۇگىندە وبلىستا جىرتقىشتار كوبەيىپ، ولاردىڭ سانى 3 مىڭنان اسىپ جىعىلدى. ءقازىر مايماق اياقتىلار اسىرەسە ومارتاشىلاردىڭ مازاسىن الا باستاعان، دەپ حابارلايدى «حابار 24».
گلۋبوكوە اۋدانىنداعى ستەپنوي،توپيحا اۋىلدارى ماڭىندا ارا شارۋاشىلىعىمەن اينالىسىپ جۇرگەندەر شىعىنعا ۇشىراپ جاتىر.
ساراپشىلاردىڭ سوزىنشە ارا ۇياسىن بۇزىپ جۇرگەن كوبىنەسە قونجىقتار. ويتكەنى نەگىزىنەن ايۋلار ادامداردىڭ تەرريتورياسىنا ەمەس، كەرىسىنشە ادام ولاردىڭ اۋماعىنا كىرىپ كەتكەن. ونىڭ ۇستىنە ءبىر رەت بالدىڭ ءدامىن تاتقان جىرتقىش ول جەرگە قايتارا كەلە بەرەدى.
ماسەلەن جاز شىققالى بەرى ايۋلار الەكسەي ۋستينسيەۆتىڭ ومارتاسىنداعى التى ۇيانى تالقانداپ كەتىپتى. ءقازىر ول شارۋاشىلىعىن كولىكپەن كۇزەتەتىن بولعان. الايدا اڭ دا اڭقاۋ ەمەس، ءدال كۇزەت بوساڭسىعان كەزدى اڭدىپ ءجۇرىپ، تاتتىلەردى قولدى ەتەدى ەكەن.
«ولار ءتىپتى يتتەن دە جاسقانبايتىن بولدى. سوندىقتان ەندى نە ىستەرىمىزدى بىلمەي ءجۇرمىز. ەڭ قىزىعى ارا ۇيالارىنىڭ ىشىنەن ەڭ بالى كوبىن تاڭداپ،تالقانداپ الىپ كەتەدى. ءقازىر امالىمىز تاۋىسىلعان سوڭ مىنەكي التىنشى كۇن كەزەكتەسىپ ومارتا باسىن كۇزەتىپ ءجۇرمىز. سوندىقتان ءتيىستى ورگاندار تاراپىنان قاندايدا دا ءبىر ناقتى ءىس-شارا بولسا دەگەن تىلەگىمىز بار»،-دەدى ومارتاشى الەكسەي ۋستنيسيەۆ.
«بىزگە شاعىم تۇسكەن سوڭ بىردەن سول جەرگە بارىپ ءوز كەڭەسىمىزدى بەرەمىز. ايۋلاردى ءتۇرلى ادىستەرمەن ۇركىتىپ، قورقىتىپ وتىرۋ كەرەك. قاتتى دىبىستار شىعارىپ نەمەسە ەلەكتر قورعاندارىن قۇرىپ قويعان دۇرىس. ايۋدى اتسا، ءوز ءومىرىن قورعاۋ ءۇشىن بولسا دا اتقان ادام قىلمىستىق جاۋاپكەرشىلىككە تارتىلادى. ويتكەنى زاڭ سولاي»،-دەيدى «وسكەمەن ورمان شارۋاشىلىعى» قمم قىزمەتكەرى سەرگەي وسينسيەۆ.