100 جاسقا دەيىن ءومىر سۇرەتىن ادامدار قاراسى كۇللى الەم بويىنشا شاپشاڭ ءوسىپ كەلەدى.
الداعى بىرنەشە ونداعان جىلدان سوڭ، دالىرەگى، وسى عاسىردىڭ ورتا شەنىنە تامان ولاردىڭ سانى شامامەن ءۇش جارىم ميلليونعا جەتەدى دەپ حابارلايدى aqshamnews.kz.
بۇل جايىندا islam.kz پورتالى Life اقپارات كوزىنە سىلتەمە جاساي وتىرىپ ءمالىم ەتەدى.
ءومىر ءسۇرۋ ۇزاقتىعىنىڭ ارتۋىنا ەڭ الدىمەن ءومىر ءسۇرۋ ساپاسىنىڭ جاقسارعانى مەن مەديسينالىق جەتىستىكتەر ىقپال ەتىپ وتىر. دەگەنمەن، ءومىر ءسۇرۋ ۇزاقتىعىنىڭ ارتۋ قارقىنى وسى عاسىردا باياۋلاۋى مۇمكىن. ساراپشىلار تاراپىنان «ادامزات ءوز دەنەسىنىڭ مۇمكىندىكتەرىنىڭ بيولوگيالىق شەگىنە جاقىندادى» دەگەن پىكىر ايتىلا باستادى. بىلىكتى ماماندار قارتايۋ تەك جاسۋشالاردىڭ توزۋىنان عانا ەمەس، سونىمەن قاتار، بىرنەشە فاكتوردى قامتيتىن كۇردەلى جانە كوپقىرلى تەتىكتەردەن تۇراتىنىن اتاپ ءوتتى. قازىرگى ۋاقىتتا قارتايۋدىڭ 10-15 ءتۇرلى مەحانيزمى بەلگىلى، ءبىراق ولاردىڭ بارلىعى بۇل پروسەستىڭ ءبىر شيرەگى عانا.
«ءبىز قارتايۋدىڭ نەگىزگى سەبەبىن بىلمەيمىز جانە ونىڭ سەبەبى مەن سالدارى نە ەكەنىن ناقتى اجىراتا المايمىز. بۇل ۇلكەن پارادوكس (كەرەعارلىق)، ەۆوليۋسيالىق جۇمباق»، - دەيدى گەرونتولوگتار.
سويتسە دە بۇگىنگى تاڭدا ادامنىڭ ءومىر ءسۇرۋ ۇزاقتىعىنىڭ ارتۋى باياۋلاعانىمەن تاياۋ بولاشاقتا گەندىك ينجەنەريانىڭ جەتىلدىرىلگەن نۇسقالارىنىڭ ارقاسىندا ادامنىڭ عۇمىرى ۇزارا تۇسپەك.