8 شىلدەدەن باستاپ جۇڭگو، ءۇندىستان جانە يران ازاماتتارىنىڭ ەلىمىزگە 14 كۇنگە ۆيزاسىز كىرۋىنە رۇقسات بەرىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇل جايىندا قازاقستاننىڭ كوشى-قون كوميتەتى الەۋمەتتىك جەلىدە حابارلادى. وعان سەنسەك، 8 شىلدەدەن باستاپ اتالعان ەلدەر ءۇشىن ءبىرجاقتى ۆيزاسىز رەجيم ەنگىزىلىپ وتىر. ۇكىمەتتىڭ ءتيىستى قاۋلىسى 7 شىلدە كۇنى شىققان. ال جۇڭگو ازاماتتارىنا 72 ساعات ۆيزاسىز كىرۋگە بەرىلگەن رۇقسات كۇشىن جويادى.
ۆيزاسىز رەجيم تالاپتارىنا سايكەس ءۇندىستان، يران جانە جۇڭگو ازاماتتارى شەكارادان كىرگەن ساتتەن باستاپ 14 كۇن قازاقستان اۋماعىندا ەركىن ءجۇرىپ-تۇرا الادى. ىسكەرلىك، جەكە ماقساتتاعى، تۋريستىك جانە باسقا دا ساياحاتتارعا رۇقسات بەرىلگەن. ۆيزاسىز رەجيم بويىنشا قازاقستاندا ءجۇرىپ-تۇرعان جالپى ۋاقىت ءاربىر 180 كۇن كەزەڭ ىشىندە كۇنتىزبەلىك 42 كۇننەن اسپاۋعا ءتيىس.
بۇل شارتتى بۇزعان جاعدايدا شەتەلدىكتەر مىناداي اكىمشىلىك جاۋاپكەرشىلىككە تارتىلادى:
- 10 اەك-تەن 25 اەك-كە دەيىن ايىپپۇل
- 15 تاۋلىككە دەيىن قاماۋ
- قازاقستان اۋماعىنان تىسقارى شىعارۋ
- 5 جىل قازاقستانعا كىرۋىنە تىيىم سالۋ (سوت شەشىمى بويىنشا).
«بۇدان باسقا، شەتەلدىك ازاماتتارعا ۆيزاسىز رەجيم اياسىندا اقى تولەنەتىن جۇمىس ىستەۋىنە تىيىم سالىنادى. ونداي جاعدايدا قابىلداۋشى تاراپ الدىن الا قازاقستاندا جۇمىس ىستەۋگە ءتيىستى رۇقساتتى جانە ۆيزانى راسىمدەۋى قاجەت» دەلىنگەن حابارلامادا.