جۇمىس ىزدەگەن ازاماتتاردىڭ ەرىكتى كوشى-قونىنا جاردەمدەسۋ دە ورتالىقتىڭ مىندەتىنە كىرەدى.
الەۋمەتتىك كودەكستى ىسكە اسىرۋ اياسىندا 1 شىلدەدەن باستاپ ەلىمىزدىڭ وبلىس ورتالىقتارى مەن مەگاپوليستەرىندە 20 ەڭبەك موبيلدىلىگى ورتالىعى قۇرىلادى، دەپ حابارلايدى Almaty-akshamy.kz
ال جۇمىس ىستەپ تۇرعان حالىقتى جۇمىسپەن قامتۋ ورتالىقتارى مانساپ ورتالىقتارى بولىپ قايتا قۇرىلاتىن بولادى، دەپ حابارلادى Halyq Uni ءتىلشىسى.
ەڭبەك موبيلدىلىگى ورتالىقتارىنىڭ نەگىزگى جاڭا فۋنكسيالارى:
- جۇمىس كۇشىنە سۇرانىس پەن ۇسىنىستى تالداۋ، بولجاۋ نەگىزىندە ءوڭىردىڭ ەڭبەك رەسۋرستارىنىڭ تەڭگەرىمىن قامتاماسىز ەتۋ؛
- وڭىرلىك جۇمىسپەن قامتۋ كارتالارىن ازىرلەۋ جانە ولاردى جەرگىلىكتى جەرلەردە ىسكە اسىرۋدى ۇيلەستىرۋ؛
- جۇمىسپەن قامتۋدىڭ بەلسەندى شارالارىن ىسكە اسىرۋ جانە وڭىردە ىسكە اسىرىلاتىن بارلىق مەملەكەتتىك باعدارلامالار مەن جەكە باستامالار شەڭبەرىندە اشىلاتىن جۇمىس ورىندارىنىڭ قۇرىلۋىنا مونيتورينگ جۇرگىزۋ؛
- جۇمىسپەن قامتۋدى قامتاماسىز ەتۋ ماقساتىندا ازاماتتاردىڭ ەرىكتى كوشى-قونىنا جاردەمدەسۋ جانە ازاماتتاردى كوشىرۋ باعدارلامالارىن وڭىرلىك دەڭگەيدە ۇيلەستىرۋ؛
- جۇمىس ىزدەۋشى رەتىندە جۇگىنگەن جانە جۇمىسسىز ادامداردى تىركەۋ؛
- حالىقتى، جەرگىلىكتى اتقارۋشى ورگانداردى جانە ۋاكىلەتتى مەملەكەتتىك ورگاندى وڭىرلىك ەڭبەك نارىعىنىڭ جاي-كۇيى تۋرالى حاباردار ەتۋ.
«جاڭا ورتالىقتار وسى فۋنكسيالاردى ىسكە اسىرۋ ءۇشىن ءوڭىر اۋماعىندا جۇمىس ىستەيتىن ەڭبەك نارىعىنىڭ بارلىق ينستيتۋتتارىن بەلسەندى تۇردە تارتاتىن بولادى. ول ءۇشىن ولارعا ازاماتتاردىڭ نىسانالى توپتارىن جۇمىسقا ورنالاستىرۋمەن بايلانىستى جەكەلەگەن فۋنكسيالاردى اۋتسورسينگكە بەرۋ قۇقىعى بەرىلەدى. ءوز كەزەگىندە مانساپ ورتالىقتارى قالالار مەن اۋداندارداعى ەڭبەك موبيلدىلىگى ورتالىقتارىنىڭ فيليالدارى بولادى. جاڭا ورتالىقتاردىڭ نەگىزگى مىندەتى ۇلتتىق ەڭبەك نارىعىنىڭ كورسەتكىشتەرىمەن ۇشتاستىرا وتىرىپ، جەرگىلىكتى ەرەكشەلىكتەردى ەسكەرىپ، وڭىرلىك جۇمىسپەن قامتۋ ساياساتىن ىسكە اسىرۋ»، – دەدى ەڭبەك جانە حالىقتى الەۋمەتتىك قورعاۋ مينيسترلىگىنىڭ حالىقتى جۇمىسپەن قامتۋ دەپارتامەنتىنىڭ ديرەكتورى اسقار نيازوۆ.
بۇل رەتتە ءقازىر جۇمىسپەن قامتۋعا جاردەمدەسۋ، ەرىكتى تۇردە قونىس اۋدارۋ، اتاۋلى الەۋمەتتىك كومەك تاعايىنداۋ بويىنشا ءىس ماكەتتەرىن قالىپتاستىرۋ بويىنشا كورسەتىلەتىن قىزمەتتەردىڭ بارلىق سپەكترى ساقتالادى جانە ولاردى كورسەتۋ سول مەكەنجايلار بويىنشا ورنالاساتىن مانساپ ورتالىقتارىندا جالعاسا بەرەدى.
بۇل ترانسفورماسيا جۇمىسپەن قامتۋ قىزمەتىن جۇيەلى تۇردە قايتا قۇرۋعا، جۇمىستى جاقسارتۋعا جانە مەملەكەت كورسەتەتىن ەڭبەك دەلدالدىعى بويىنشا قىزمەتتەردىڭ ساپاسىن ارتتىرۋعا باعىتتالعان.
«قىزمەت كورسەتۋ جۇيەسىن ودان ءارى دامىتۋ ماقساتتارىنىڭ ءبىرى – جۇمىسپەن قامتۋ سالاسىنداعى بارلىق قىزمەتتەر مەن قولداۋ شارالارىن تولىق سيفرلاندىرۋ. سيفرلىق جۇمىسپەن قامتۋ ورتالىقتارى – بۇل جۇمىسپەن قامتۋ ورگاندارى مەن ولاردىڭ كليەنتتەرى، ياعني ىزدەنۋشىلەر مەن جۇمىس بەرۋشىلەر اراسىنداعى قارىم-قاتىناستاردى جانە بيزنەس-پروسەستەرىن تۇبەگەيلى وزگەرتىپ، ولاردى ونلاين-فورماتقا اۋىستىرۋعا مۇمكىندىك بەرەدى»، – دەدى اسقار نيازوۆ.
ونلاين قىزمەتتەردى ىسكە قوسۋ حالىقتىڭ جۇمىسپەن قامتۋ ورگاندارى قىزمەتكەرلەرىمەن تىكەلەي بايلانىسىن ازايتۋعا جانە ازاماتتار ءۇشىن قىزمەتتەردىڭ قولجەتىمدىلىگىن ارتتىرۋعا مۇمكىندىك بەردى. بۇگىندە جۇمىسپەن قامتۋ سالاسىندا قىزمەت الۋعا ءوتىنىش بىلدىرگەن ازاماتتاردىڭ شامامەن 77%-ى ەلەكتروندىق ەڭبەك بيرجاسى ارقىلى ونلاين-فورماتتى پايدالانادى.
ەحاقم ماماندارى وسى جىلعى 12-14 ماۋسىم ارالىعىندا ەلىمىز بويىنشا حالىقتى جۇمىسپەن قامتۋ ورتالىقتارىنىڭ قىزمەتكەرلەرى ءۇشىن وقىتۋ سەمينارلارىن وتكىزىپ، جۇمىسپەن قامتۋ ورگاندارىن ترانسفورماسيالاۋ ماقساتتارى مەن ەڭبەك موبيلدىلىگى ورتالىقتارىن قۇرۋ قاجەتتىلىگى تۋرالى تۇسىندىرمە بەردى.