مەملەكەتتىك قۋىرشاق تەاترىنىڭ ۇجىمى جاقىندا سانكت-پەتەربۋرگ قالاسىنداعى «كۋكART» حالىقارالىق قۋىرشاق تەاترلارى فەستيۆالىنە قاتىسادى.
قۋىرشاق تەاترلارىنىڭ قارا شاڭىراعى، الماتى قالاسىنىڭ مادەني-تاريحي قۇندىلىقتارىنىڭ ءبىرى بولعان اتالمىش تەاتر شىعارماشىلىعى قارقىندى دامۋ ۇستىندە. دىتتەپ وتىرعان فەستيۆالدىڭ شىمىلدىعى 22 ماۋسىم كۇنى تۇرىلسە، الماتى مادەنيەت باسقارماسىنا قاراستى مەملەكەتتىك قۋىرشاق تەاترى «رومەو مەن دجۋلەتتا» (رەج.: د.جۇمابايەۆا) سپەكتاكلىمەن 27 ماۋسىم كۇنى زازەركالە تەاترىنىڭ ساحناسىندا ونەر كورسەتەدى.
كورەرمەندەر مەن ساراپشىلار نازارىنا ءتۇرلى باعىتتاعى قويىلىمدار ۇسىناتىن ونەر دوداسى – 1993 جىلدان بەرى وتكىزىلىپ كەلە جاتقان قايىرىمدىلىق باعىتتاعى كوممەرسيالىق ەمەس جالعىز فەستيۆال. ءتۇرلى ەلدەر مەن حالىقتار اراسىنداعى مادەني كوپىرگە اينالعان بيىلعى فەستيۆالدە جۇڭگو، گەرمانيا، سەربيا ەستونيا، تىۆا، قازاقستان جانە سانكت-پەتەربۋرگ، ماسكەۋ قالالارىنىڭ ونەر وشاقتارى ءوز قويىلىمدارىن ۇسىنادى. فەستيۆال اياسىندا تەاترلىق جوبالار، ارنايى سپەكتاكلدەر ساحنالادى. الەم كلاسسيكاسىنىڭ وزىق ۇلگىسى «رومەو مەن دجۋلەتتا» (رەج.: د.جۇمابايەۆا) سپەكتاكلى نەگىزگى باعدارلاماعا ەنىپ وتىر.
«رومەو مەن دجۋلەتتا» تەاتر رەپەرتۋارىنا 2019 جىلدىڭ 24 قاڭتارىندا قوسىلعان ەرەسەكتەرگە ارنالعان سپەكتاكلدەرىڭ ءبىرى. 18 جاستان جوعارى كورەرمەندەرگە ارنالعان سپەكتاكل سۇلۋلىق پەن تازالىققا تابىنۋدان، البىرتتىعى جاراسقان ەكى عاشىقتىڭ تاعدىرى ارقىلى اۋلەت پەن توبىردىڭ بىتپەس داۋىن اشۋدان تۋىنداعان. جارىققا شىققالى بىرنەشە حالىقارالىق تەاتر فەستيۆالىندە ب ا ق سىناعان سپەكتاكل قۋىرشاق تەاترىنىڭ جاڭا باعىتتاعى باتىل تاجىريبەسىن كورسەتىپ كەلەدى.
قۋىرشاق تەاترى بۇعان دەيىن 2019 جىلى وتكەن اتالمىش فەستيۆالگە ە.يونوۆتىڭ «انا جۇرەگى» قويىلىمىمەن قاتىسىپ، «ۇزدىك اكتەرلىك انسامبل» نوميناسياسىن قانجىعاعا بايلاعان بولاتىن.