15 مىڭنان استام شەتەلدىك ازامات قازاقستاندا ەڭبەك ەتۋدە
2021 جىلعى 1 ماۋسىمداعى جاعداي بويىنشا، 15 668 شەتەلدىك ازامات جەرگىلىكتى اتقارۋشى ورگانداردىڭ رۇقساتىمەن قازاقستان رەسپۋبليكاسىنىڭ اۋماعىندا ەڭبەك ەتۋدە، دەپ حابارلادى Almaty-akshamy.kz. ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ سايتىنا سىلتەم جاساپ.
شەتەلدىك جۇمىس كۇشىن (بۇدان ءارى – شجك) تارتۋعا بەرىلگەن رۇقساتتاردىڭ ىشىندە مىناداي ساناتتار بار: ءبىرىنشى سانات – 667 (باسشىلار جانە ولاردىڭ ورىنباسارلارى)، ەكىنشى سانات – 3 260 (قۇرىلىمدىق بولىمشەلەردىڭ باسشىلارى). تارتىلعان شجك-نىڭ نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – ولاردىڭ سانى تيىسىنشە 7 592 ادام جانە 517 ادام. سونداي-اق ماۋسىمدىق جۇمىستارعا 1 825 ادام، ال كورپوراتيۆتىك اۋىستىرۋ شەڭبەرىندە 1 807 ادام تارتىلعان.
قازىرگى ۋاقىتتا قازاقستاندا شجك پايدالاناتىن 1 782 جۇمىس بەرۋشى بار. ولاردا شامامەن 483 مىڭ قازاقستان ازاماتى جۇمىس ىستەيدى، بۇل جالپى جۇمىسشىلار سانىنىڭ 97%-ىن قۇرايدى.
ەڭبەكشى ميگرانتتار نەگىزىنەن مىنا ەلدەردەن كەلەدى: قىتايدان – 3 689 ادام، وزبەكستاننان – 1 887 ادام، تۇركيادان – 1 679 ادام، ءۇندىستاننان – 1 090 ادام، ۇلىبريتانيادان – 959 ادام.
ەستەرىڭىزگە سالا كەتەيىك، ىشكى ەڭبەك نارىعىن قورعاۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن ەلىمىزگە شەتەلدىك مامانداردى تارتۋعا ارنالعان كۆوتا بەلگىلەيدى. 2021 جىلى كۆوتا مولشەرى جۇمىس كۇشىنە شاققاندا 0،31%-دى نەمەسە 29،3 مىڭ بىرلىكتى قۇرادى.