قازاقستان تاۋەلسىزدىگى كۇنىنە وراي الماتى حالىقارالىق اۋەجايىندا جولاۋشىلارعا ارنالعان اكسيا ۇيىمداستىرىلادى
قازاقستان رەسپۋبليكاسىنىڭ تاۋەلسىزدىگى، ەلدىڭ بوستاندىعى، بىرلىگى جانە وركەندەۋىنىڭ سيمۆولى بولىپ تابىلاتىن باستى ۇلتتىق مەرەكە – تاۋەلسىزدىك كۇنىنە وراي الماتى قالاسىنىڭ تۋريزم باسقارماسى ۇقك شەكارا قىزمەتىنىڭ شەكارالىق باقىلاۋ باسقارماسى جانە الماتى حالىقارالىق اۋەجايىمەن بىرلەسىپ «سىيلىققا ءتاتتى كادەسىي» اتتى ەرەكشە اكسيا ۇيىمداستىرادى. ءىس-شارانىڭ ماقساتى – جولاۋشىلارعا مەرەكەلىك كوڭىل-كۇي سىيلاپ، الماتىلىقتاردىڭ قوناقجايلىق داستۇرىنە دەگەن تەرەڭ قۇرمەتىن كورسەتۋ، دەپ حابارلايدى aqshamnews.kz
پاسپورتتىق باقىلاۋدان ءوتۋ كەزىندە جولاۋشىلارعا ءداستۇرلى قازاقستاندىق شوكولاد پەن پەچەنە تۇرىندە ءتاتتى سىيلىقتار تابىستالادى. بۇل اكسيا 50-دەن استام حالىقارالىق رەيسپەن كەلگەن 5 مىڭنان استام جولاۋشىنى قامتىپ، الماتىعا كەلگەن العاشقى مينۋتتاردان-اق جىلى شىراي مەن دوستىق اتموسفەراسىن سىيلاماق.
بۇل باستاما تۋريستىك سەرۆيستىڭ ساپاسىن ارتتىرۋعا باعىتتالعان «Visitor Experience» جاھاندىق باعدارلاماسىنىڭ ءبىر بولىگى بولىپ تابىلادى.
الماتى الەمنىڭ تۇكپىر-تۇكپىرىنەن كەلەتىن ساياحاتشىلار ءۇشىن زاماناۋي، قوناقجاي جانە مادەنيەتكە باي باعىت رەتىندە قالانىڭ وڭ ءيميدجىن قالىپتاستىرۋدا. Mastercard دەرەكتەرى بويىنشا، قىزمەت كورسەتۋ دەڭگەيىنىڭ جوعارى بولۋى مەن قالادان العان ەرەكشە اسەرلەر قوناقتاردىڭ قايتا ورالۋىنا ىقپال ەتەدى — 2024 جىلدىڭ قاڭتار-قازان ايلارى ارالىعىندا قايتالاما ساپارلار ۇلەسى 25%-دى قۇرادى.
شەكارالىق قىزمەت پەن كەدەندىك باقىلاۋ قىزمەتكەرلەرىنىڭ كاسىبي دەڭگەيىن ارتتىرۋعا ەرەكشە نازار اۋدارىلۋدا. قوناقجايلىلىق بويىنشا جىل سايىنعى فاسيليتاسيالىق سەسسيالار ولارعا حالىقارالىق قوناقتارمەن قارىم-قاتىناس جاساۋ داعدىلارىن جەتىلدىرۋگە كومەكتەسەدى، بۇل جوعارى ستاندارتتاعى قىزمەت كورسەتۋدى قامتاماسىز ەتىپ، ساياحاتشىلارعا قامقورلىق پەن قۇرمەت سەزىمىن سىيلايدى.
ستاتيستيكا الماتىنىڭ وڭىردەگى جەتەكشى تۋريستىك ورتالىقتاردىڭ ءبىرى رەتىندە تابىستى ەكەنىن كورسەتەدى: 2024 جىلدىڭ 9 ايىندا جالپى تۋريستىك اعىن 14،2%-عا ارتىپ، 1 729 601 ادامدى قۇرادى. شەتەلدىك تۋريستەر سانى 24%-عا ءوسىپ، 507 567 ادامعا جەتتى، بۇل قازاقستانداعى جالپى تۋريستىك اعىننىڭ جارتىسىنان استامىن قۇرايدى.