شەتەلدىك كولىكتەر قالاي زاڭداستىرىلادى؟

ءبىرجولعى زاڭداستىرۋ تۋرالى جاريالادى.

قازاقستاندىق پوليسەيلەر شەتەلدىك كولىكتەر قالاي زاڭداستىرىلاتىنىن ايتتى، دەپ حابارلادى Almaty-akshamy.kيا Polisia.kz سىلتەمە جاساپ. 

مەملەكەت باسشىسى اعىمداعى جىلدىڭ 1 قىركۇيەگىنە دەيىن ەلگە اكەلىنگەن شەتەلدىك اۆتوكولىكتەردى ءبىرجولعى زاڭداستىرۋ تۋرالى جاريالادى. بۇل شارا ءىس جۇزىندە قالاي ىسكە اساتىنى جايىندا ق ر ءىىم اكىمشىلىك پوليسيا كوميتەتى ءتوراعاسىنىڭ مىندەتىن اتقارۋشى قايسار سۇلتانبايەۆ ايتىپ بەردى. 

«قازىرگى ۋاقىتتا زاڭناماعا قاجەتتى وزگەرىستەر ەنگىزىلۋدە. پارلامەنت سالىق كودەكسىنە ەنگىزىلگەن العاشقى تۇزەتۋلەردى قابىلدادى. زاڭداستىرۋعا جاتاتىن اۆتوكولىكتەردى باستاپقى تىركەۋ ءۇشىن تولەنەتىن الىمدى 200 مىڭ تەڭگە كولەمىندە دەپ بەلگىلەدى. ءبىر مەزگىلدە ەكىنشى زاڭ جوباسىنىڭ اياسىندا ەكولوگيالىق كودەكسكە تۇزەتۋلەر ەنگىزىلۋدە. ول جەردە زاڭداستىرىلاتىن اۆتوكولىكتەر ءۇشىن كادەگە جاراتۋ تولەمىن الىپ تاستاۋ بولىگىندە تۇزەتۋلەر ەنگىزىلەدى. اتالعان تۇزەتۋلەر باسقا زاڭ جوباسى شەڭبەرىندە پارلامەنتتە قارالۋدا. ودان باسقا ىشكى ىستەر مينيسترلىگى زاڭداستىرۋدى جۇرگىزۋدىڭ ءتارتىبىن، شارتتارى مەن مەرزىمدەرىن ايقىندايتىن ۇكىمەت قاۋلىسىنىڭ جوباسىن ازىرلەۋدە. اتالعان جوبا اعىمداعى جىلدىڭ 29 قاراشاسىندا اشىق تالقىلاۋ راسىمىنەن ءوتۋ ءۇشىن ءىىم-نىڭ رەسمي سايتىنا ورنالاستىرىلدى»، - دەدى سپيكەر.

ونىڭ ايتۋىنشا، ىزدەۋدە جۇرگەن (قىلمىستىق كولىك) نەمەسە تولىق كەدەندىك تازارتۋدان وتپەگەن، سونداي-اق 2022 جىلدىڭ 1 قىركۇيەگىنەن كەيىن اكەلىنگەن اۆتوكولىكتەر زاڭداستىرۋعا جاتپايدى.

«قازاقستاندا تۇراقتى جۇرگەن شەتەلدىك اۆتوكولىكتەردىڭ ناقتى سانى تۋرالى دەرەكتەر جوق. سونىمەن قاتار اعىمداعى جىلدىڭ 1 قىركۇيەگىنە دەيىن شەتەلدىك اۆتوكولىكتەرگە 300 مىڭنان استام اۆتوساقتاندىرۋ ءپوليسى رەسىمدەلگەنىن انىقتادىق. اۆتوساقتاندىرۋلاردىڭ ەڭ كوبى رەسەيدەن كەلگەن اۆتوكولىكتەرگە بەرىلگەن، ولار شامامەن 260 مىڭ، قىرعىزستان اۆتوكولىكتەرى – 25،5 مىڭ جانە ارمەنيا كولىكتەرى – 18 مىڭ»، - دەدى مامان.

زاڭداستىرۋ جۇمىستارى جارتى جىل كولەمىندە جۇرگىزىلەتىن بولادى.

«قاجەتتى زاڭنامالىق وزگەرىستەر كۇشىنە ەنگەننەن كەيىن جانە ءتيىستى ۇكىمەت قاۋلىسى قابىلدانعاننان كەيىن زاڭداستىرۋ باستالادى. بۇل رەتتە زاڭداستىرۋدى جارتى جىلدىڭ كولەمىندە وتكىزۋ جوسپارلانۋدا»، -  دەدى سپيكەر.