باقىلاۋشىلار تاڭعى ساعات 07:00-دەن باستاپ ەلوردادا جانە ەل قالالارىندا سايلاۋ ۋچاسكەلەرىنىڭ اشىلۋىنا قاتىستى.
سايلاۋ ۋچاسكىلەرىنىڭ اشىلۋىندا تمد پارلامەنتارالىق اسسامبلەياسىنىڭ باقىلاۋشىسى ولەگ سەپكين قاتىستى.
ول ارىپتەستەردىڭ پىكىرلەرى مەن ءوز تاجىريبەسىن ەسكەرە وتىرىپ، داۋىس بەرۋ ورتالىقتارىندا زاڭ بۇزۋشىلىق فاكتىلەرى تىركەلمەگەنىن اتاپ ءوتتى.
تمد پارلامەنتارالىق اسسامبلەياسى باقىلاۋشىسىنىڭ ايتۋىنشا، دەلەگاسيا پارلامەنتتە، سايلاۋ كوميسسيالارىندا كەزدەسۋلەر وتكىزىپ، كونستيتۋسياعا وزگەرىستەر ەنگىزۋگە قاتىسقان كوپتەگەن مامانداردىڭ پىكىرىن بىلگەن.
«مەملەكەت جىل باسىندا بولعان وقيعالاردىڭ قايتالانۋىنا جول بەرمەۋدى وزىنە مىندەتى ەتىپ قويدى. بۇل تۋرالى پرەزيدەنت سۇحباتىندا دا ايتتى. قازاقستان باسشىلىعىنىڭ مۇنداي وقيعالارعا جەدەل جاۋاپ بەرىپ، كونستيتۋسياعا تەز وزگەرىستەر دايىنداعانى جاقسى جانە دۇرىس شەشىم بولدى دەپ ايتۋعا بولادى»، — دەدى ولەگ سەپكين.
وزبەكستان ورتالىق سايلاۋ كوميسسياسىنىڭ ءتوراعاسى زاينيددين نيزامحودجايەۆ دەلەگاسيا كۇننىڭ ءبىرىنشى جارتىسىندا 10 — نان استام ۋچاسكەگە، ونىڭ ىشىندە التاۋى – نۇر-سۇلتاندا، بەسەۋى – اقمولا وبلىسىندا بولعانىن حابارلادى.
«ءبىز ادامدار جوعارى بەلسەندىلىكپەن داۋىس بەرۋگە كەلگەنىن كوردىك، ولاردىڭ كوپشىلىگى — جاستار. بۇل، جاستاردىڭ ەلدىڭ بولاشاعىنا نەمقۇرايلى قارامايتىنىن كورسەتەدى. ءبىزدىڭ باقىلاۋشىلارىمىز ءتۇرلى ۇيىمداردىڭ قۇرامىندا تەك نۇر-سۇلتانعا عانا ەمەس، ەلىمىزدىڭ باسقا دا وڭىرلەرىنە قاتىسادى. ءبىز ءارقاشان قازاقستانداعى سايلاۋعا بايلانىستى بارلىق ءىس-شارالارعا قاتىسامىز. بۇل ەكى ەلدىڭ قارىم-قاتىناسىن تەك جاقسارتادى»، — دەدى زاينيددين نيزامحودجايەۆ.
تۇركيانىڭ جوعارى سايلاۋ كەڭەسىنىڭ ءتوراعاسى اققاييا مۇحارەمنىڭ ايتۋىنشا، ولار باستاپقىدا تۇركىستانعا كەلىپ، رەفەرەندۋمعا دايىندىق بارىسىن زەرتتەپ، كەيىن 5 ماۋسىم كۇنى قازاقستان استاناسىندا بولعان. ونىڭ ايتۋىنشا، ۇيىمداستىرۋ جۇمىستارى جوعارى دەڭگەيدە جۇرگىزىلدى. سونداي-اق، باقىلاۋشى بىرنەشە سايلاۋ ۋچاسكەلەرىنە بارىپ، حالىقتىڭ رەفەرەندۋمعا دەگەن قىزىعۋشىلىعىن ءوز كوزىمەن كورگەن.
«ارينە، رەفەرەندۋم ءجيى قولدانىلاتىن باستاما ەمەس، ءبىراق بۇل دەموكراتياعا اكەلەتىن قادام. بۇل رەفەرەندۋم قازاقستاننىڭ جانە بۇكىل حالىقتىڭ بولاشاعى ءۇشىن وتە ماڭىزدى. مەن الدىڭعى سايلاۋعا دا قاتىسقامىن. وسى جولى اقپاراتتىق تەحنولوگيالاردىڭ مۇمكىندىكتەرى شەبەر پايدالانىلعانىن ايتقىم كەلەدى. بۇل وتە جاقسى تاجىريبە»، — دەپ قوستى اققاييا مۇحارەم.