بۇل تۋرالى ىشكى ىستەر مينيسترلىگى اكىمشىلىك پوليسيا كوميتەتى ءتوراعاسىنىڭ مىندەتىن اتقارۋشى قايسار سۇلتانبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كولىك يەسى قۇجاتتاردى تاپسىرعان سوڭ بەكىتىلگەن قاعيدا بويىنشا ونىڭ تۇپنۇسقالىعى مەن سايكەستىگى، ياعني كولىكتىڭ ەل اۋماعىنا 2022 جىلعى 1 قىركۇيەككە دەيىن اكەلىنگەنى، ىزدەۋدە بار-جوعى تەكسەرىلەدى. كەدەندىك راسىمدەردەن ءوتۋى جانە سوڭعى تىركەلگەن جەردەن ەسەپتەن شىعۋى انىقتالادى. اۆتوكولىكتى قازاقستان اۋماعىنا كىرگىزۋ كۇنى ۇلتتىق قاۋىپسىزدىك كوميتەتىنىڭ شەكارا قىزمەتى جانە مەملەكەتتىك كىرىستەر كوميتەتىنىڭ جۇيەلەرى ارقىلى ايقىندالادى»، - دەدى قايسار سۇلتانبايەۆ مينيسترلىكتە وتكەن باسپا ءسوز ءماسليحاتىندا.
سپيكەردىڭ مالىمەتىنشە، جوعارىدا اتالعان ساتتەردى تەكسەرۋ، انىقتاۋ پروسەسى تولىقتاي اۆتوماتتاندىرىلعان.
«شەكارادان وتكەن ءار كولىككە VIN-كود بەرىلەدى. شەكارا قىزمەتىندە نەمەسە مەملەكەتتىك كىرىستەر ورگاندارىندا كولىك قۇرالىن اكەلۋ تۋرالى مالىمەتتەر بولماعان جاعدايدا وندا ماسەلە اۆتوساقتاندىرۋ ءپوليسىنىڭ العاشقى رەسىمدەلگەن كۇنى بويىنشا انىقتالادى. سونداي-اق ەلگە اكەلىنگەن اۆتوكولىكتەر ينتەرپول جانە تمد ەلدەرىنىڭ بازالارى بويىنشا تەكسەرىلەدى. ودان بولەك ەۋرازيا ەكونوميكالىق وداعىنىڭ ءبىرىڭعاي كەدەندىك جۇيەسى بويىنشا قاداعالانادى»، - دەيدى مينيسترلىك وكىلى.