كولىكتىڭ ەلگە قاي كۇنى كىرگىزىلگەنىن انىقتاۋ جۇمىسى دا اۆتوماتتاندىرىلعان.
قازاقستاندا شەتەلدەن اكەلىنگەن اۆتوكولىكتەردى زاڭداستىرۋ ناۋقانى ءالى دە بەلگىسىز. ءىىم وكىلدەرى ءتيىستى قاۋلى بۇگىندە ۇكىمەتتىڭ قاراۋىندا ەكەنىن ءمالىم ەتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ايتا كەتسەك، بۇعان دەيىن پرەزيدەنت قاسىم-جومارت توقايەۆ شەتەلدىك كولىكتەردى زاڭداستىرۋ ماسەلەسىنە بايلانىستى ۇكىمەت جۇمىسىن سىنعا الىپ، كوپشىلىكتىڭ ءالى كۇنگە دەيىن اقپاراتپەن تولىق قامتاماسىز ەتىلمەگەنىن ايتتى.
ءىىم دەرەگىنشە، ءقازىر ەل اۋماعىندا زاڭداستىرۋعا جاتاتىن اۆتوكولىكتەر سانى 300 مىڭنان اسادى. دەنى - رەسەيدەن اكەلىنگەن. بۇعان دەيىن رەسمي دەرەككوزدەردە پارلامەنتتىڭ سالىق كودەكسىنە ەنگىزىلگەن العاشقى تۇزەتۋلەردى قابىلداعانى حابارلاندى. زاڭداستىرۋعا جاتاتىن كولىكتەردى باستاپقى تىركەۋ ءۇشىن تولەنەتىن الىم 200 مىڭ تەڭگە كولەمىندە دەپ بەلگىلەندى.
«قولجەتىمدى بولسا، ءتيىمدى. شەتەلدەن كىرگەن زاڭدى بولسا، ارينە. انا جاقتا تىركەۋدە جوق، مىنا جاقتا دا جوق بولىپ قالسا، ۇكىمەت جۇرگىزبەي قويادى. جولعا شىعارمايدى»، – دەدى قالا تۇرعىنى ارىستانبەك ەلەۋسىز.
«تولەم قۇنى 200-250 مىڭ تەڭگە بولسا، ءبىز ءۇشىن ۇلكەن كومەك»، – دەدى قالا تۇرعىنى رينات قوجابەرگەنوۆ
ايتا كەتسەك، ىزدەۋدە جۇرگەن نەمەسە تولىق كەدەندىك تازارتۋدان وتپەگەن، سونداي-اق 2022 جىلدىڭ 1 قىركۇيەگىنەن كەيىن اكەلىنگەن اۆتوكولىكتەر زاڭداستىرۋعا جاتپايدى. الايدا قاڭتاردىڭ العاشقى كۇندەرىنە جوسپارلانعان ناۋقاننىڭ باستالار شاعى ءالى دە بەلگىسىز.
«شەتەلدىك كولىكتەردى زاڭداستىرۋ بويىنشا قاۋلى بۇگىنگى تاڭدا ۇكىمەتتىڭ قاراۋىندا. ۇكىمەت تاراپىنان قول قويىلعاننان كەيىن، زاڭدى كۇشىنە ەنگەن سوڭ، ءبىرىنشى كۇننەن باستاپ تىركەۋ جۇمىستارى جۇرگىزىلە باستايدى»، – دەدى ق ر ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى التىنبەك جامالييەۆ.
قۇزىرلى ورگان وكىلىنىڭ سوزىنشە، شەتەلدىك كولىكتىڭ ەلگە قاي كۇنى كىرگىزىلگەنىن انىقتاۋ جۇمىسى دا اۆتوماتتاندىرىلعان. تەمىر تۇلپاردىڭ شەكارادان وتكەن ۋاقىتى ۇقك شەكارا قىزمەتىنىڭ دەرەكتەر بازاسى بويىنشا نەمەسە اۆتوساقتاندىرۋ ءپوليسىنىڭ العاشقى راسىمدەلگەن كۇنى بويىنشا انىقتالادى.
شەتەلدەن كىرگەن كولىگىن زاڭداستىرۋ ءۇشىن يەسى قانداي تەكسەرۋدەن وتەتىنى مامانداندىرىلعان حالىققا قىزمەت كورسەتۋ ورتالىعىنىڭ قىزمەتكەرلەرىنە دە ازىرگە بەيمالىم.