شەتەلدەن 7 ايلىق بالا تابىلىپ، قازاقستانعا قايتارىلدى.
بۇل تۋرالى وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى مالىمدەمە جاسادى، دەپ حابارلايدى aqshamnews.kz.
كوميتەت 7 ايلىق قازاقستان ازاماتىنىڭ رەسەي فەدەراسياسىنان ەلگە ورالعانىن حابارلايدى. كەلگەن بويدا ءبۇلدىرشىن بالالار اۋرۋحاناسىنا قارالىپ، تەكسەرىلۋ ءۇشىن جاتقىزىلدى. قازىرگى ۋاقىتتا ونىڭ جاعدايى تۇراقتى. مەديسينالىق شارالار اياقتالعان سوڭ نارەستە "بالالار ءۇيى" كمم-نە جىبەرىلەدى. بالانى الىپ كەلۋ پروسەسىنە ادىسكەر-قامقورشى جانە انەستەزيولوگ-رەانيماتولوگ قاتىستى.
"ءبىز ءۇشىن ءاربىر بالانىڭ قانداي جاعداي بولماسىن، قاجەتتى قولداۋ الۋى ماڭىزدى. سونداي-اق ەلىمىزدىڭ ءاربىر ازاماتىنا بارىنشا قامقورلىق كورسەتىپ، قاۋىپسىزدىگىن قامتاماسىز ەتۋگە تىرىسىپ جاتىرمىز. ءتيىستى ورگاندار مەن ماماندار كىشكەنتاي نارەستەنى ەلگە قايتارۋ ءۇشىن جۇمىس اتقاردى. وسى جاقتا ونىڭ وسىپ-جەتىلۋى ءۇشىن بىلىكتى ماماندار قولدان كەلگەننىڭ ءبارىن جاسايدى"، – دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
ۆەدومستۆو مالىمەتىنشە، كوميتەت بالالاردىڭ قاۋىپسىزدىگى مەن ءال-اۋقاتىن قامتاماسىز ەتە وتىرىپ، ولاردىڭ قۇقىقتارى مەن مۇددەلەرىن قورعاۋ جونىندەگى بەلسەندى جۇمىستى جالعاستىرىپ جاتىر.
"ءبىز قاجەت بولعان جاعدايدا بالالاردى وتانىنا قايتارۋ ءۇشىن بار كۇش-جىگەرىمىزدى سالامىز جانە ولاردىڭ كاسىبي مامانداردىڭ قامقورلىعىندا بولۋىن قامتاماسىز ەتەمىز"، – دەلىنگەن حابارلامادا.