«500 عالىم» جوباسى اياسىندا شەتەلدە تاعىلىمدامادان وتەتىن عالىمداردى ىرىكتەۋ جالعاسىپ جاتىر.
وتىنىمدەر 15 ناۋرىزعا دەيىن قابىلدانادى. بۇل باعدارلاما پرەزيدەنت قاسىم-جومارت توقايەۆتىڭ تاپسىرماسىنا سايكەس، جىل سايىن 500 عالىمنىڭ الەمنىڭ جەتەكشى عىلىمي ورتالىقتارىندا كاسىبي قۇزىرەتتىلىگىن دامىتۋ ماقساتىندا بەكىتىلگەن، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
جەتەكشى ماماندار مەملەكەت ەسەبىنەن تاعىلىمدامادان ءوتىپ، الەمنىڭ ۇزدىك جوعارى وقۋ ورىندارى، عىلىمي ورتالىقتارى مەن سالالىق ۇيىمدارىندا بىرلەسكەن زەرتتەۋلەر جۇرگىزەدى.
«حالىقارالىق باعدارلامالار ورتالىعى وتىنىشتەردى قابىلداۋدى جانە عالىمداردى ىرىكتەۋدى وتكىزەدى. بىلتىر ءبىز عالىمداردى ىرىكتەۋدىڭ جاڭا ەرەجەلەرىن ازىرلەدىك. وسىنىڭ ارقاسىندا كوميسسيا قۇرامىنا ينجەنەرلىك-تەحنيكالىق، مەديسينالىق، گۋمانيتارلىق جانە جاراتىلىستانۋ عىلىمدارىنىڭ دوكتورلارى ەندى»، - دەپ اتاپ ءوتتى «حالىقارالىق باعدارلامالار ورتالىعى» اق باسقارما ءتوراعاسى ءانۋار جانعوزين.
تاعىلىمدامادان وتۋگە ارنالعان ۇيىمداردىڭ ءتىزىمى حالىقارالىق اكادەميالىق رەيتينگتەردىڭ توپ-250 پوزيسياسىنا كىرەتىن 416 شەتەلدىك جوعارى وقۋ ورنى، عىلىمي-زەرتتەۋ ورتالىعى مەن سالالىق ۇيىمدى كوزدەيدى.
ولاردىڭ ىشىندە پرينستون، يەل، توكيو ۋنيۆەرسيتەتى، لوندون يمپەريالىق كوللەدجى، كورەي وزىق تەحنولوگيالار ينستيتۋتى، سينگاپۋر فيزيكالىق-حيميالىق زەرتتەۋلەر ينستيتۋتى، سونداي-اق ءىرى كورپوراسيالار – مايكروسوفت، ەپپل ينك، تويوتا گرۋپپ، سامسۋنگ جانە ت.ب. سەكىلدى جەتەكشى جوو مەن زەرتتەۋ ورتالىعى بار.
مەملەكەت تاعىلىمدامادان وتۋشىلەرگە تاعىلىمدامادان ءوتۋ، ۇشۋ، مەديسينالىق ساقتاندىرۋ شىعىنىن وتەيدى، سونداي-اق اي سايىن ستيپەنديانى تولەيدى.
وتىنىمدەردى قابىلداۋ 2023 جىلعى 15 ناۋرىزعا دەيىن جالعاسادى، سونداي-اق 23 تامىز جانە 13 قازان ارالىعىندا وتەدى.