بۇل ءۇشىن مەرزىمدى اسكەري قىزمەتشىلەر اسكەري قىزمەت تۋرالى كۋالىكتى جانە اسكەري بيلەتتىڭ كوشىرمەسىن تاپسىرسا بولعانى.
27 قاڭتاردا ورتالىق كوممۋنيكاسيالار قىزمەتىندە وتكەن بريفينگتە قازاقستان رەسپۋبليكاسى قورعانىس ءمينيسترىنىڭ كەڭەسشىسى ايگۇل تولەمبايەۆا اسكەري بورىشىن وتەگەن ازاماتتارعا ءبىلىم بەرۋ تۋرالى ايتتى، دەپ حابارلايدى Almaty-akshamy.kz.
ايگۇل تولەمبايەۆا 2022 جىلدان بەرى قورعانىس مينيسترلىگى اسكەرگە شاقىرىلۋشىلارعا ءبىلىم بەرۋدە جەڭىلدىكتەر جاساۋ جونىندە باستاما كوتەرىپ، كوپتەگەن جۇمىستار اتقارىپ جاتقانىن ەسكە سالدى.
«بىرىنشىدەن، اسكەري بورىشىن وتەگەن جىگىتتەر كۇنتىزبەلىك جىل ىشىندە ۇبت-نى ەسەپكە الماي، اقىلى نەگىزدە ەلىمىزدىڭ بارلىق جوعارى وقۋ ورىندارىنا تۇسە الادى. عىلىم جانە جوعارى ءبىلىم ءمينيسترىنىڭ بۇيرىعىمەن بەكىتىلگەن قابىلداۋدىڭ ۇلگىلىك قاعيدالارىنا ءتيىستى وزگەرىستەر ەنگىزىلگەنىن اتاپ وتەمىن. بۇل ەرەجەنى ادىلەت مينيسترلىگى بەكىتتى جانە ءقازىر تىركەۋ ساتىسىندا»، - دەدى قازاقستان رەسپۋبليكاسى قورعانىس ءمينيسترىنىڭ كەڭەسشىسى ايگۇل تولەمبايەۆا.
سپيكەر مۇنداي كەلىسىمشارت جاساسقان 40 جوعارى وقۋ ورنى تەگىن ءبىلىم الۋعا بارلىعى 3000-عا جۋىق ورىن بەرەتىنىن ايتتى.
سونداي-اق ونىڭ ايتۋىنشا، جاۋىنگەرلىك دايارلىق سالاسىندا ەڭ جوعارى ناتيجە كورسەتكەن اسكەر قاتارىنا شاقىرىلعان ساربازدار ۋنيۆەرسيتەت تاراپىنان 100% جەڭىلدىكپەن وقۋعا تۇسۋگە مۇمكىندىك الادى. جوعارى وقۋ ورىندارىمەن ءتيىستى كەلىسىمدەر جاسالدى، ولاردىڭ تىزىمىمەن دەپارتامەنتتىڭ رەسمي سايتىندا تانىسۋعا بولادى.
سپيكەردىڭ ايتۋىنشا، مەرزىمدى اسكەري بورىشىن وتەگەن اسكەري قىزمەتشىلەر دە مۇنداي كافەدرالار بار جوعارى وقۋ ورىندارىنىڭ اسكەري كافەدرالارىندا ەمتيحانسىز تەگىن وقي الادى.
«اسكەردە بورىشىن وتەگەننەن كەيىن ولار زاپاستاعى جاۋىنگەر اتانادى، ال ەگەر وفيسەرلىك شەن العىلارى كەلسە، اسكەري كافەدراعا ءتۇسىپ، زاپاستاعى لەيتەنانت اتاعىن الادى. ەڭ باستىسى، اسكەري بورىشىن وتەپ،جاقسى ناتيجە كورسەتكەن جىگىتتەر قازاقستان رەسپۋبليكاسى قورعانىس مينيسترلىگىنىڭ اسكەري وقۋ ورىندارىنا كونكۋرستىق ىرىكتەۋ نەگىزىندە ەمتيحانسىز تۇسۋگە مۇمكىندىك الادى، قىزمەت ناتيجەلەرى بويىنشا»، - دەدى ايگۇل تولەمبايەۆا.
بۇل جەڭىلدىكتەردى پايدالانۋ ءۇشىن مەرزىمدى اسكەري قىزمەتشىلەر جوعارى وقۋ ورىندارىنا قۇجاتتار ءتىزىمىن، حالىققا قىزمەت كورسەتۋ ورتالىقتارىندا بەرىلەتىن اسكەري قىزمەت تۋرالى كۋالىكتى جانە اسكەري بيلەتتىڭ كوشىرمەسىن تاپسىرسا بولعانى.
"بۇل جاعدايدا ولار اڭگىمەلەسۋدىڭ نەگىزىندە جانە ونىڭ قورىتىندىسى بويىنشا ۇبت-نى ەسەپكە الماي، جوعارى وقۋ ورىندارىنا تۇسۋگە قۇقىلى بولادى"، - دەپ سەندىردى ايگۇل تولەمبايەۆا.