بالالار جىلىنا وراي وتاندىق ديپلوماتتار شەت مەملەكەتتەردەگى قاراكوزدەرىمىزدىڭ تۇرمىس-تىرشىلىگىمەن ەتەنە تانىسۋعا كىرىستى.
ەلىمىزدىڭ بەلگياداعى ەلشىلىگىنىڭ كونسۋلى قازاقستاننان بالا اسىراپ الۋ قۇقىنا يە بەلگيالىق اگەنتتىك وكىلدەرىمەن، اسىراندى بالالارمەن كەزدەستى.
بەلگيادا ءقازىر 400-دەن استام قازاقستاندىق بالعىن بار. دەنى ەلدىڭ فلاندريا ايماعىندا تۇرادى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
«قازاقتار كەلەدى» دەگەندى ەستىپ كوپپەن بىرگە اگەنتتىككە التى جاستاعى ايدىن دا اسىعىپتى. قاراكوزى مولدىرەپ، تۇلىمشاعى جەلبىرەگەن ۇلدىڭ وسكەمەندەگى بالالار ۇيىنەن بەلگياعا كەلگەنىنە بيىل ءۇش جىل. قۇلاعىندا مۇكىسى بولعاندىقتان، كوپپەن ەمىن-جارقىن اڭگىمەلەسۋگە قىسىلادى-دەيدى اناسى.
"مەكتەپتىڭ ءبىرىنشى سىنىبىندا وقيدى. جازۋدى، وقۋدى ۇيرەنىپ ءجۇر. سىرتتا فۋتبول ويناعاندى، جۇزگەندى جاقسى كورەدى. ءبىز ونى اسىراپ الۋ ءۇشىن قازاقستاندا 15 اپتا بولدىق. قازاقستان قانداي ادەمى ەل ەكەنىن ايتىپ وتىرامىز. 10 جاسقا تولعاندا تۋعان جەرىنە اپارامىز. سوندا ءوزىن ومىرگە اكەلگەن اتا-اناسىمەن كەزدەسەمىن دەسە، قارسى ەمەسپىز"، - دەيدى ايدىننىڭ اناسى شارلوتت ۆاندەرحەياح.
ايدىن مەن وزگە دە قازاقستاندىق بالعىنداردىڭ بوتەن ەلگە باۋىر باسىپ كەتۋىنە سالتانات كومەكتەسىپ ءجۇر. ول بەلگياعا قازاقستاننان اسىراپ الىنعان تۇڭعىش بالا. اتا-اناسى اننەمي مەن پول سەمەيدەگى بالالار ۇيىنەن اكەتكەندە 1،5 جاستا ەدى. بيىل 23-كە تولدى. ۋنيۆەرسيتەتتى ءتامامداپ، ءقازىر «الەۋمەتتىك قىزمەتكەر»رەتىندە وسى اگەنتتىكتە جۇمىس ىستەپ ءجۇر.
"2019 جىلى تۋعان جەرىمە ءبىرىنشى رەت ساپارلادىم. استانا مەن الماتىدا، ءوزىم دۇنيەگە كەلگەن سەمەيدەگى بالالار ۇيىندە بولدىم. ەلىمىز وتە ادەمى، تابيعاتى كەرەمەت، حالقى تاماشا. وزىمە ۇقساعان ادامداردى كورىپ قۋاندىم. اسىقپاي ساياحاتتاپ، مادەنيەتىمەن تانىسۋ ءۇشىن جاقىندا تاعى دا بارامىن. تۋعان اناممەن كەزدەسكىم كەلەدى. ءبىراق، ول تۋرالى اقپارات از. تاپپاي ءجۇرمىن. ەگەر سىزدەر ونى ىزدەۋگە كومەكتەسسەڭىزدەر، جاقسى بولار ەدى"، - دەيدى قازاقستاننان اسىراپ الىنعان تۇڭعىش قىز سالتانات بەرتلس.
«بەلگيالىقتار جاۋدىركوزدەردى جانىنان ارتىق باعالاپ، بار جاعدايىن جاساپ وتىر»-دەيدى بالا اسىراپ الۋ اگەنتتىگىنىڭ جەتەكشىسى اننەمي پاسحيۋيس. وسىعان كوز جەتكىزۋ ءۇشىن كەلگەن ەلىمىزدىڭ بەلگياداعى ەلشىلىگىنىڭ كونسۋلى بالالارعا كادەسىي تارتۋ ەتتى. ەلدەن كەلگەن ءدال وسىنداي بازارلىقتى ديپلوماتتار جىلدىڭ سوڭىنا دەيىن بەلگياداعى بارلىق قازاقستاندىق اسىراندى بالالارعا ۇلەستىرمەك.