پورتۋگاليادا وتكەن تۋرنيردە قازاقستاندىق رەگبيشى قىزدار جۇلدەلى ورىنعا يە بولدى

رەگبيدەن قازاقستان ايەلدەر قۇراماسى پورتۋگاليادا وتكەن ALGARVE SEVENS ءتۋرنيرىنىڭ كۇمىس جۇلدەگەرى اتاندى.

سپورتتى دامىتۋ ديرەكسياسىنىڭ مالىمەتىنشە، تۋرنيرگە پورتۋگاليانىڭ كوماندالارىنان بولەك فرانسيا، انگليا، يسپانيا، گونكونگ قۇرامالارى جانە ەۋروپانىڭ باسقا دا ەلدەرى قاتىستى، دەپ حابارلايدى Almaty-akshamy.kz 24.kz-كە سىلتەمە جاساپ.

12 ۇجىم جينالعان تۋرنيردە اننا ياكوۆليەۆا جاتتىقتىراتىن قازاقستان قىزدارى ۇزدىكتەر توبىندا ونەر كورسەتتى. ءوز توبىندا الدىمەن ءدال وسى ءتۋرنيردىڭ 2019 جىلعى جەڭىمپازىن وڭاي جەڭگەن جەرلەستەرىمىز ودان كەيىنگى ويىنداردى دا ءساتتى وتكىزىپ، ەش قيىندىقسىز فينالعا شىقتى. الايدا چەمپيوندىق كەزدەسۋدە فرانسيا ارۋلارىنان جەڭىلىپ، كۇمىستى قاناعات قىلدى. ەسەپ – 14:17.

"كۇزدە ءبىزدى ازيا چەمپيوناتى كۇتىپ تۇر. جىلدىڭ ەڭ ماڭىزدى ءتۋرنيرى سول. قازىردەن باستاپ دايىندىقتى جان-جاقتى پىسىقتاپ جاتىرمىز. وكىنىشكە قاراي، وسى تۋرنيردە سارى قۇرلىقتاعى باستى باسەكەلەسىمىز گونكونگپەن كەزدەسە المادىق. ولار باسقا توپتا بولدى"،- دەيدى رەگبي 7 ايەلدەر قۇراماسىنىڭ باس باپكەرى اننا ياكوۆليەۆا.