شەت ءتىلىن مەڭگەرگەنىن راستايتىن سەرتيفيكاتى بار وقۋشىلار ۇبت-دا ونى تاپسىرۋدان بوساتىلادى

تۇلەكتەردىڭ حالىقارالىق سەرتيفيكاتتارىندا كورسەتىلگەن ءتىل مەڭگەرۋ دەڭگەيى بالعا اۋىستىرىلادى.

بۇل تۋرالى «اشىق» نقا پورتالىندا جاريالانعان عىلىم جانە جوعارى ءبىلىم مينيسترلىگىنىڭ بۇيرىعىندا كورسەتىلگەن، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

«شەت ءتىلىن (اعىلشىن) مەڭگەرگەنىن راستايتىن Test of English as a Foreign Language Institutional Testing Programm، Internet-based Test، TOEFL Paper-based test، TOEFL pbt، International English Language Tests System، IELTS حالىقارالىق سەرتيفيكاتتارى بار تۇلعالار قالاۋى بويىنشا ۇبت-دا «شەت ءتىلى» (اعىلشىن) بەيىندىك ءپانىن نەمەسە ارنايى ءپانىن بالداردى اۋىستىرۋ شكالاسىنا سايكەس بوساتىلادى. ولار ءبىلىم بەرۋ گرانتىن تاعايىنداۋ كونكۋرسىنا قاتىسادى جانە جوعارى وقۋ ورىندارىنا اقىلى بولىمگە قابىلدانادى»، - دەلىنگەن قۇجاتتا.

تۇلەكتەردىڭ اتالعان حالىقارالىق سەرتيفيكاتتارىندا كورسەتىلگەن ءتىل مەڭگەرۋ دەڭگەيى بالعا اۋىستىرىلادى. ماسەلەن، IELTS دارەجەسى 6.0 جانە ودان جوعارى بولسا، وندا ۇبت-داعى اعىلشىن بەيىندىك ءپانى بويىنشا بالى 45-كە تەڭەسەدى. ەگەر وقۋشىنىڭ TOEFL ibt سەرتيفيكاتىنادا كورسەتىلگەن بالى 79 بولسا، بۇل جاعدايدا ول ۇبت-دا 45 بالعا اينالادى.

بۇيرىق 20 قاڭتارعا دەيىن اشىق تالقىلاۋدا بولادى.