قىتايدىڭ ءىرى ەكونوميكالىق جانە ونەركاسىپ ورتالىعى سانالاتىن شەنچجەن قالاسىنىڭ 200-دەن استام كاسىپكەرى بيىلعى 14 تامىزدا وتكەن قازاق-قىتاي ءبىرىنشى بيزنەس-فورۋمىنا قاتىستى، دەپ حابارلايدى Almaty-akshamy.kz.
قازاقستان-قىتاي ساۋداسىنا جاردەمدەسۋ قاۋىمداستىعى مەن Shenzhen Cross Supply Service Association بىرلەسىپ ۇيىمداستىرعان ءىس-شارادا قىتايدىڭ ىقتيمال ينۆەستورلارىنا قازاقستاننىڭ ينۆەستيسيالىق مۇمكىندىكتەرى تانىستىرىلدى.
فورۋمنىڭ اشىلۋىندا ق ر پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين ەكى ەل حالىقتارى اراسىندا قالىپتاسقان تىعىس بايلانىستى اتاپ ءوتتى.
ۆيسە-پرەمەر قازاقستانعا تارتىلاتىن ينۆەستيسيالاردىڭ نەگىزگى ءۇش باعىتىن ايقىندادى.
ءبىرىنشىسى – لوگيستيكا، ول قولدانىستاعى باعىتتاردى دامىتىپ، جاڭا باعىتتاردى اشۋدى، ينفراقۇرىلىم جۇرگىزىپ، جۇكتەۋ-تۇسىرۋ ورتالىقتارىن اشۋدى كوزدەيدى. وسى باعىت ءىرى كولىك وپەراتورلارى ءۇشىن ەرەكشە قىزىعۋشىلىق تۋدىرادى.
بۇگىندە شەكارا ماڭىندا ساۋدا-ەكونوميكالىق حابتار، لوگيستيكالىق ورتالىقتار جەلىسى قۇرىلۋدا، ولار ءارى قاراي كەڭەيتۋ الەۋەتى بار ەاەو جانە ورتالىق ازيا ەلدەرىنىڭ نەگىزى بولماق. قازاقستاننىڭ ءار وبلىسىنداعى ەرەكشەلىكتەردى ەسكەرە وتىرىپ قۇرىلعان ارنايى ەكونوميكالىق جانە يندۋستريالىق ايماقتار بار. ولارعا سالىقتىق پرەفەرەنسيالار پۋلى ۇسىنىلىپ، ارنايى قۇقىقتىق رەجيم قولدانىلادى. سالىقتار مەن باجداردى تولەۋدەن بوساتۋ تۇرىندەگى ينۆەستيسيالىق پرەفەرەنسيالارمەن قوسا، جاقىندا ينۆەستورلارعا باستاپقى كەزەڭدە جۇكتەمەنى ازايتۋعا باعىتتالعان ينۆەستيسيالىق سالىق نەسيەسى ەنگىزىلدى. ياعني ينۆەستورلارعا كورپوراتيۆتىك تابىس سالىعى جانە (نەمەسە) مۇلىك سالىعى اياسىندا تولەمدەردى ءۇش جىلعا دەيىنگى مەرزىمگە 100%-عا تومەندەتۋ مۇمكىندىگى بەرىلەدى، - دەدى س. جۇمانعارين.
بۇگىنگى تاڭدا جۇڭگو شەكاراسىندا كەدەرگىسىز ساۋدانى دامىتۋ ءۇشىن «قورعاس – شىعىس قاقپاسى» ارنايى ەكونوميكالىق ايماعىن (اەا) قالىپتاستىرۋ تولىعىمەن اياقتالدى. اەا ينفراقۇرىلىمىنا يندۋستريالىق جانە لوگيستيكالىق ايماقتارمەن قاتار، 2015 جىلى ەلدىڭ شىعىسىندا جۇكتەردى جيناۋ مەن تاراتۋ ءۇشىن ىسكە قوسىلعان قۇرعاق پورت كىرەدى. 2014 جىلى ليانيۋنگان پورتىندا قىتايلىق سەرىكتەستەرمەن بىرلەستىكتە لوگيستيكالىق تەرمينال قۇرىلدى، ول بۇگىندە قازاقستانعا/قازاقستاننان جۇكتەردى جينايتىن نەگىزگى بەكەت بولىپ وتىر. )9ر5ا0 پورت قىتايمەن شەكاراداعى «جەتىگەن – قورعاس» تەمىرجولى جانە «باتىس ەۋروپا – باتىس جۇڭگو» اۆتوماگيسترالىمەن تەحنولوگيالىق بايلانىس نەگىزىندە جانە ءىرى كولىك-لوگيستيكالىق وپەراتورلاردى تارتۋ ارقىلى ەۋرازيالىق ترانسكونتينەنتالدىق تاسىمالداردى دامىتۋدىڭ جاڭا كەزەڭىن اشتى.
ۆيسە-پرەمەر ينۆەستيسيالار ءۇشىن ەكىنشى باعىت رەتىندە ءونىمدى تەرەڭ وڭدەۋدى، ال ءۇشىنشى باعىت رەتىندە اۋىل شارۋاشىلىعىن اتاپ ءوتتى.
قازاقستان مەن قحر اراسىنداعى ءوزارا ساۋدا 2022 جىلى رەكوردتى كورسەتكىشتەرگە جەتىپ، 24،1 ملرد دوللاردى قۇرادى. اتاپ ايتقاندا، قازاقستاندىق ءونىمنىڭ قىتايعا ەكسپورتى ۇشتەن بىردەن استامعا ارتىپ، 13،2 ملرد دوللار بولدى. يمپورت 33،5% ارتىپ، 11 ملرد دوللاردى قۇرادى. ەلدەر اراسىنداعى ساۋدا-ساتتىق 2023 جىلعى ءبىرىنشى جارتىجىلدىقتا 20،5% كوبەيىپ، 13،6 ملرد دوللاردى قۇرادى، ونىڭ ىشىندە 6،3 ملرد دوللار قازاقستاندىق ەكسپورتقا تيەسىلى.