شەكارادان 30 كەلىدەن اسا گەروين الىپ وتپەك بولعان شەتەلدىككە سوت ۇكىمى شىقتى.
تۇركىستان وبلىسىندا 30 كەلىدەن استام گەرويندى رەسەيگە تاسىمالداماق بولعان شەتەلدىككە سوت ۇكىمى شىقتى. بۇل تۋرالى وبلىستىق سوتتىڭ باسپا ءسوز قىزمەتى مالىمدەدى، دەپ حابارلايدى اlmaty-akshamy.kz
وبلىستىق سوتتىڭ باسپا ءسوز قىزمەتىنىڭ مالىمەتىنشە، شەتەل ازاماتى 2022 جىلدىڭ 22 شىلدەسىندە ساعات 18.00 شاماسىندا وزىنە تيەسىلى «عord Mondeo» اۆتوكولىگىمەن وزبەكستاننىڭ «گيشت-كۋپريك» شەكارا باقىلاۋ بەكەتىنەن وتكەن. سودان قازاقستان رەسپۋبليكاسىنىڭ «جىبەك جولى» مەملەكەتتىك شەكارا باقىلاۋ بەكەتىنە كەلىپ توقتاعان.
قازاقستاننىڭ ۇلتتىق قاۋىپسىزدىك كوميتەتىنىڭ شەكارا باقىلاۋ ءبولىمىنىڭ كينولوگ مامانى «بەلكا» لاقاپ اتتى قىزمەتتىك يتپەن تاجىكستاندىقتىڭ باسقارۋىنداعى كولىكتى تەكسەرگەن. تەكسەرۋ بارىسىندا كولىكتىڭ استىڭعى جاعىندا ورنالاسقان جانار-جاعارماي باگىندە جاسىرىلعان 63 دانا ءتۇسسىز پوليەتيلەن پاكەتتەرگە ورالعان زاتتار تابىلعان. تابىلعان زات 31 كيلوگرامم 465،2 گرامم گەروين بولىپ شىققان.
سوتتالۋشىعا قىلمىستىق كودەكستىڭ 24-بابى 3-بولىگى (قىلمىسقا دايىندالۋ جانە وقتالۋ/اياقتالماعان قىلمىس)، 286-بابى 4-بولىگى (اينالىسى شەكتەلگەن زاتتاردىڭ كونترابانداسى) جانە 297-بابى 3-بولىگى 3-تارماعىمەن (اسا ءىرى مولشەردەگى ەسىرتكى زاتتارىن وتكىزۋ ماقساتىندا زاڭسىز دايىنداۋ، ساقتاۋ، تاسىمالداۋ، وتكىزۋ) ايىپ تاعىلدى.
«تاجىكستان ازاماتى ءوز كىناسىن ءىشىنارا مويىنداپ، سوتتان جەڭىل جازا تاعايىنداۋىن سۇرادى. سوت ۇكىمىمەن سوتتالۋشى وزىنە تاعىلعان ايىپتار بويىنشا كىنالى دەپ تانىلىپ، وعان تۇپكىلىكتى 15 جىل مەرزىمگە باس بوستاندىعىنان ايىرۋ جازاسى تاعايىندالدى»، - دەلىنگەن حابارلامادا.
شەتەلدىك ازامات جازاسىن قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى تۇزەۋ مەكەمەسىندە وتەيتىن بولادى.
ۇكىم زاڭدى كۇشىنە ەنگەن جوق.