ق ر اۋىل شارۋاشىلىعى مينيسترلىگى قىرعىز ماماندارىمەن بىرلەسىپ، شەگىرتكە تارالۋ وشاقتارىن باقىلاۋ ءۇشىن شەكارالاس اۋماقتاردى تەكسەرۋدى باستادى.
بۇعان دەيىن وزبەكستانمەن شەكارادا وسىعان ۇقساس شارالار جۇرگىزىلگەن بولاتىن. بۇل تۋرالى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك ءجۇمانعاريننىڭ توراعالىعىمەن وتكەن شەگىرتكەنىڭ تارالۋىنا قارسى ءىس-قيمىل جونىندەگى رەسپۋبليكالىق شتاب وتىرىسىندا اۋىل شارۋاشىلىعى ۆيسە-مينيسترى ەرمەك كەنجەحان ۇلى حابارلادى.
ۆيسە-مينيستردىڭ مالىمەتىنشە، قازىرگى ۋاقىتتا وزبەكستانمەن شەكارالاس اۋماقتاردا ماروككالىق جانە باسقا دا توپتاساتىن شەگىرتكە وشاقتارى انىقتالماعان.
«بۇگىن قىرعىز تاراپىمەن شەكاراداعى قازاقستاندىق ۋچاسكەلەرىندە بىرلەسكەن تەكسەرۋدى باستادىق. شەگىرتكە زيانكەستەرىنىڭ نەگىزگى وشاقتارى قىرعىزستاننىڭ وڭتۇستىك ايماقتارىندا شوعىرلانعان. الايدا، قازىرگى ۋاقىتتا جاندىكتەردىڭ قازاقستان باعىتىندا تارالۋ ءقاۋپى تىركەلمەگەن»، — دەدى ەرمەك كەنجەحان ۇلى.
سونىمەن قاتار رەسەي فەدەراسياسىمەن شەكارادا دا تەكسەرۋلەر جالعاسۋدا. اباي جانە سولتۇستىك قازاقستان وبلىستارىنداعى شەكارالاس ۋچاسكەلەر تەكسەرىلدى — شەگىرتكە زيانكەستەرىنىڭ تارالۋ جاعدايلارى انىقتالمادى. الداعى كۇندەرى، ماۋسىمنىڭ ءبىرىنشى جانە ەكىنشى ونكۇندىگىندە اقتوبە، اتىراۋ، باتىس قازاقستان، قوستاناي، شىعىس قازاقستان جانە پاۆلودار وبلىستارىندا وسىعان ۇقساس شارالاردى وتكىزۋ جوسپارلانۋدا.
قىتايدىڭ شەكارالاس ايماقتارىنا كەلەتىن بولساق، قازىرگى ۋاقىتتا شەگىرتكەنىڭ تارالۋى تۋرالى رەسمي راستالعان جاعدايلار تىركەلمەگەن.
2 ماۋسىمداعى جاعداي بويىنشا 6،1 ملن گەكتار اۋماق تەكسەرىلدى، بۇل جوسپارلانعان كولەمنىڭ 35،6%-ىن قۇرايدى. حيميالىق وڭدەۋگە 1 ملن گا اسا اۋماق جاتادى، ونىڭ 971،5 مىڭ گا وڭدەلدى، بۇل بولجانعان 2،1 ملن گەكتاردىڭ 46،3%-ىن قۇرايدى.
قازىرگى ۋاقىتتا وڭدەۋ جۇمىستارى 15 وبلىستا جۇرگىزىلۋدە. سولتۇستىك قازاقستان وبلىسىندا شارالار زيانكەستەردىڭ العاشقى وشاقتارى پايدا بولعان كەزدە باستالادى. بارلىعى 443 بۇرىككىش تەحنيكا بىرلىگى جۇمىلدىرىلعان، ايماقتار قاجەتتى رەسۋرستارمەن قامتاماسىز ەتىلگەن.
شتاب وتىرىسىنىڭ قورىتىندىسى بويىنشا ۆيسە-پرەمەر سەرىك جۇمانعارين نەگىزگى قورعانىس شارالارى ءىس جۇزىندە اياقتالعان ايماقتاردان تەحنيكانى شەگىرتكەنىڭ تارالۋ ىقتيمالدىعى جوعارى اقتوبە جانە قوستاناي وبلىستارىنا جەدەل تۇردە اۋىستىرۋدى تاپسىردى.