تۇركىستان وبلىسىنا جۇمىس ساپارى بارىسىندا اۋىل شارۋاشىلىعى ءمينيسترى ايداربەك ساپاروۆ جەرگىلىكتى شارۋالارعا شەگىرتكە زيانكەستەرىنە قارسى وڭدەلەتىن اۋماقتاردى انىقتاۋ جانە وڭدەۋ ماسەلەلەرى پرەمەر-مينيستردىڭ ەرەكشە باقىلاۋىندا ەكەنىن جەتكىزدى.
سونداي-اق مينيستر اشم شەگىرتكەلەردىڭ ەگىستىك جەرلەردى باسىپ قالۋىن بولدىرماۋ جانە اۋىل شارۋاشىلىعى قۇرىلىمدارىنا زالالىن تيگىزبەۋ ماقساتىندا قابىلدانىپ جاتقان شارالار تۋرالى ايتتى، دەپ حابارلايدى Almaty-akshamy.kz.
2024 جىلى زيانكەس جاندىكتەردىڭ تارالۋىنىڭ تابيعي ءوسىمى بايقالادى. ولاردىڭ تارالۋ اۋماعىنىڭ ارتۋى 2023 جىلى دا انىقتالعان بولاتىن. سول كەزدە 1،5 ملن گا اۋماق وڭدەلدى. ال بيىل شەگىرتكە زيانكەستەرىنە قارسى وڭدەۋ جوسپارلانعان اۋماق – 2،5 ملن گا، ونىڭ ىشىندە تۇركىستان وبلىسى بويىنشا – 271 مىڭ گا.
«بيىل 2،5 ملن گا وڭدەۋ جوسپارلانعان، بۇل – سوڭعى جىلدارى (2016 جىلدان باستاپ) حيميالىق وڭدەۋ جۇرگىزىلەتىن ەڭ اۋقىمدى اۋماق. 2023 جىلداعىدان 1 ملن گەكتارعا ارتىق. سالىستىرمالى تۇردە ايتار بولساق، بىزدەگى وڭدەلەتىن جەر ورتالىق ازيانىڭ بارلىق ەلى وڭدەيتىن اۋماقتاردى قوسقاننان دا كوپ»، — دەپ اتاپ ءوتتى ايداربەك ساپاروۆ.
مينيستر مونيتورينگ پەن وڭدەۋ ءۇشىن نەگىزگى جانە قوسىمشا رەسۋرستار تارتىلعانىن اتاپ ءوتتى.
اتاپ ايتقاندا، ەل بويىنشا 2،5 مىڭنان استام مامان، 427 ارنايى تەحنيكا: 289 جەر ءۇستى جەلدەتكىش پەن شتانگالى بۇرىككىش، 56 اەروزولدى گاز گەنەراتورى، 36 اسا جەڭىل اۋە تەحنيكاسى، 36 ۇشاق جۇمىلدىرىلعان.
بيىل العاش رەت ناقتى نىسانداردى وڭدەۋگە دروندار تارتىلدى، بۇل جەتۋى قيىن جەرلەردەگى جۇمىستى جەڭىلدەتتى.
«سونىمەن قاتار كورشىلەرمەن جانە حالىقارالىق ۇيىمدارمەن جۇمىس ىستەپ جاتىرمىز. وتكەن جۇمادا عانا، 7 ماۋسىمدا ءبىز FAO الاڭىندا شەگىرتكەگە قارسى كۇرەس ماسەلەسى بويىنشا ورتالىق ازيا ەلدەرىنىڭ اۋىل شارۋاشىلىعى مينيسترلەرىنىڭ كەزدەسۋىن وتكىزدىك. كۇش-جىگەردى ۇيلەستىرۋ تالقىلاندى. رەسەي تاراپىمەن كەڭەس وتكىزىلدى. وزبەك ارىپتەستەرمەن بىرلەسكەن وڭدەۋ جۇمىستارى جۇرگىزىلىپ جاتىر»، — دەپ تۇيىندەدى ايداربەك ساپاروۆ.