شاۆقات راحمونوۆ - ەل ماقتانىشى

ارالاس جەكپە-جەك الەمىندەگى ەڭ بەدەلدى ۇيىم – UFC-دە ونەر كورسەتەتىن وتانداسىمىز شاۆقات راحمونوۆ كەزەكتى كەزدەسۋىندە جەڭىسكە جەتتى. تۋريزم جانە سپورت ءمينيسترى ەرمەك مارجىقپايەۆ اتاقتى سپورتشىنى قۇتتىقتاپ، الداعى تۋرنيرلەردە دە ءساتتى ونەر كورسەتۋىن تىلەدى.

«ەلىمىزدىڭ تاۋەلسىزدىك كۇنىندە تاڭ ازانىمەن اقش-تان اقجولتاي حابار جەتتى. ارالاس جەكپە-جەكتەگى ەل ماقتانىشى شاۆقات راحمونوۆ بۇگىن UFC-دە كەزەكتى ايقاسىن وتكىزىپ، قازاق ەلىن تاعى ءبىر جارقىن جەڭىسىمەن قۋانتتى. ەگەمەندىك كۇنىندە ەل تۇرعىندارىن قۋانىشقا بولەگەن داڭقتى سپورتشىمىزدى جەڭىسىمەن شىن جۇرەكتەن قۇتتىقتايمىن!»،-دەپ جازدى مينيستر Telegram كانالىندا.

ايتا كەتەيىك، 40 جاستاعى امەريكالىق سپورتشى ستيۆەن تومپسون بۇگىنگە دەيىن سپورتتىق كارەراسىندا 24 رەت وكتاگونعا شىعىپ، 17 مارتە جەڭىس تويىن تويلاعان.

ال شاۆقات راحمونوۆتىڭ ءجۇرىپ وتكەن جولى جانكۇيەرلەردىڭ كوز الدىندا. 29 جاستاعى قانداسىمىز 2014 جىلدان بەرى ارالاس جەكپە-جەكپەن اينالىسىپ كەلەدى. وسى ۋاقىت ارالىعىندا 17 رەت ايقاس الاڭىنا شىعىپ، بارلىق باسەكەنى ايقىن باسىمدىقپەن اياقتادى. 8 قارسىلاسىن مەرزىمىنەن بۇرىن تىزە بۇكتىرگەن.

بۇل – جەرلەسىمىزدىڭ 18ء-شى جەڭىسى.