شاۆكات راحمونوۆ ارالاس جەكپە-جەكتە مەرزىمىنەن بۇرىن جەڭىسكە جەتتى

شاۆكات راحمونوۆ لاس-ۆەگاستا UFC شەبەرىن مەرزىمىنەن بۇرىن جەڭدى.

قازاقستاندىق شاۆكات راحمونوۆ (16-0) لاس-ۆەگاستا (اقش) وتكەن UFC 285 ارالاس جەكپە-جەك باسەكەسىندە جەڭىسكە جەتتى، دەپ حابارلايدى اlmaty-akshamy.kz قازاقپاراتقا سىلەمە جاساپ.

ول امەريكاندىق بەلگىلى فايتەر دجەفف نيلمەن (15-4) شەبەرلىك بايقاستى. ناتيجەسىندە ءۇشىنشى راۋندتا ونى تۇنشىقتىرۋ ادىسىمەن جەڭىپ كەتتى.

ايتا كەتسەك، جەكپە-جەك الدىندا دجەفف نيل UFC ورتا سالماقتاعى رەيتينگىندە شاۆكات راحمونوۆتان الدا تۇردى. رەيتينگتە امەريكاندىق سپورتشى جەتىنشى ورىنعا جايعاسسا، قازاقستاندىق ونىنشى ورىنعا تۇراقتاعان ەدى.

وسىلايشا شاۆكات راحمونوۆ كاسىپقوي ماڭسابىنداعى ون جەتىنشى جەڭىسىنە قول جەتكىزدى. ازىرگە ەشقانداي جەڭىلىستىڭ اششى ءدامىن تاتقان جوق.

ال دجەفف نيل بەسىنشى مارتە قارسىلاستارىنا ەسە جىبەردى.

الدىن الا ءمالىم بولعانداي، ش. راحمونوۆتىڭ قارسىلاسىنىڭ سالماعى شەكتى مەجەدەن اسىپ كەتتى. اتاپ ايتقاندا، تارازىعا تۇرعان وتانداسىمىزدىڭ سالماعى 77،56 كەلى، ال امەريكالىقتىڭ سالماعى 79،37 كەلى بولدى. وسىعان قاراماستان، شاۆكات راحمونوۆ پەن دجەفف نيل جەكپە-جەگى سالماق ايىرماشىلىعىنا قاراماستان ءوتتى.