ولار ەرەكشە قورعالاتىن تابيعي ايماققا كىرگەن
شارىن ۇلتتىق پاركى اۋماعىنا زاڭسىز كىرگەن براكونەرلەردەن بىرنەشە قارۋ تاركىلەندى، دەپ حابارلايدى Almaty-akshamy.kz ورمان شارۋاشىلىعى جانە جانۋارلار دۇنيەسى كوميتەتىنە سىلتەمە جاساپ.
30 شىلدە كۇنى ساعات 13:00 شاماسىندا شارىن ۇلتتىق تابيعي پاركى ينسپەكتورلارى جۇرگىزگەن رەيد كەزىندە «Toyota Land Cruiser» ماركالى اۆتوكولىكتىڭ ەرەكشە قورعالاتىن تابيعي ايماققا كىرگەنى انىقتالىپ، ول تۋرالى پاركتىڭ جەدەل توبىنا حابارلانعان.
«ينسپەكتورلىق توپ اۆتوكولىكتىڭ ءىزى ارقىلى بۇعىتى تاۋلارى الماساي ايماعىندا (13 اينالىم 88 ورام) مەملەكەتتىك نومەرى جوق اۆتوكولىكتى توقتاتتى. تەكسەرۋ بارىسىندا 3 ويىق ۇڭعىلى مىلتىق، 2 پىشاق، 1 راسيا جانە ارنايى كونتەينەرگە سالىنعان ەت تابىلدى»، - دەلىنگەن حابارلامادا.
سونداي-اق، اۆتوكولىك جانىنان ءسىبىر تاۋتەكەسىنە ۇقساس اڭ تەرىسى تابىلعان.
«كولىكتە بولعان ءۇش ازامات ۇستالدى. ولار - الماتى وبلىسى ەڭبەكشىقازاق اۋدانى جانە الماتى قالاسىنىڭ تۋماسى»، - دەپ حابارلايدى كوميتەتتەن.
اقپاراتتا ايتىلعانداي، تاركىلەنگەن زاتتار ۇيعىر اۋدانى پوليسيا بولىمىنە تاپسىرىلعان.