جۇرەك-قان تامىرلارى اۋرۋلارىنىڭ كوزگە انىق بىلىنبەيتىن بەلگىلەرى بارىن ءبىلدىڭىز بە؟ بۇل تۋرالى كارديولوگ وليۆەر گۋتتمان ايتىپ بەردى، - دەپ حابارلايدى اqshamnews.kz ءتىلشىسى "دوكتور پيتەرگە" سىلتەمە جاساپ.
جۇرەك-قان تامىرلارى اۋرۋلارى ءالى كۇنگە دەيىن ءولىم-جىتىمنىڭ ەڭ باستى سەبەپتەرىنىڭ ءبىرى بولىپ تۇر. سول سەبەپتى دەر كەزىندە كارديولوگقا قارالۋ – ءومىردى ساقتاپ قالۋى مۇمكىن قادام.
كارديولوگ وليۆەر گۋتتمان كينودا جۇرەگى اۋىرعان ادامدى ادەتتە دراماعا تولتىرىپ كورسەتەتىنىن ايتتى: كەنەتتەن كەۋدەسىن قىسىپ ۇستايدى، بۇگىلىپ قۇلايدى... ال شىنايى ومىردە جۇرەك سىرقاتى بۇلاي ەمەس، باسقاشا بەلگى بەرۋى مۇمكىن.
مامان جۇرەگىڭىزدى مىندەتتى تۇردە تەكسەرتۋگە سەبەپ بولاتىن بىرنەشە ءقاۋىپتى بەلگىلەردى اتاپ ءوتتى.
ءقاۋىپتى بەلگىلەر
جۇرەك اۋىرۋى ءاردايىم وتكىر سەزىلمەيدى. كەيدە ول تەك اندا-ساندا پايدا بولاتىن قىسىم نەمەسە كەۋدەدەگى قىسىلۋ سەزىمى تۇرىندە بىلىنەدى.
اسقازانداعى قىجىل نە اس قورىتۋ بۇزىلىسىنا ۇقسايتىن بەلگىلەردى دە ەلەمەۋگە بولمايدى. ەگەر ول قول، مويىن، جاق نەمەسە ارقا اۋىرسا، بۇل ستەنوكارديانىڭ بەلگىسى بولۋى ىقتيمال.
ەگەر جاتتىعۋدان كەيىن جەڭىل ەنتىگۋ قالىپتى بولسا، قاراپايىم ارەكەتتەردەن كەيىن دە دەم جەتپەي قالۋ – ءقاۋىپتى بەلگى.
«مىسالى، بۇرىن باسپالداقپەن وڭاي كوتەرىلەتىنسىز، ال ءقازىر قينالىپ قالاسىز. نەمەسە ءۇي ىشىندە جاي عانا ءجۇرىپ بارا جاتىپ اۋا جەتپەيدى، ءتىپتى باۋىڭىزدى بايلاۋ ءۇشىن ەڭكەيگەندە تىنىسىڭىز تارىلادى»، – دەيدى دارىگەر.
تاعى ءبىر دابىل – تىنىمسىز شارشاۋ مەن السىزدىك. دەمالىپ الساڭىز دا، كۇشىڭىز قالماسا، ىدىس جۋۋ، دۇكەنگە بارۋ سياقتى قاراپايىم شارۋالار دا شارشاتسا – دارىگەرگە قارالعان ءجون.
«اسىرەسە ايەلدەردە قالىپتان تىس شارشاۋ جۇرەك اۋرۋىنىڭ ەڭ ەرتە بەلگىلەرىنىڭ ءبىرى بولۋى مۇمكىن. كوبىنە ول كەۋدە اۋىرسىنۋىنسىز بايقالادى»، – دەپ ەسكەرتەدى مامان.
ەنەرگيا ازايعان سايىن زەيىن قويۋ دا قيىندايدى.
جۇرەك قاعىسىنىڭ بۇزىلىستارى
ءجيى كەزدەسەتىن تاعى ءبىر بەلگى – جۇرەك قاعىسىنىڭ بۇزىلۋى.
«كەۋدەدە ءدۇرسىل ەستىلمەي قالۋى نەمەسە ەش سەبەپسىز قاتتى سوعا باستاۋى دا نازار اۋدارۋدى قاجەت ەتەدى. مۇنداي قۇبىلىس تىنىشتىق كۇيىندە دە بايقالۋى مۇمكىن»، – دەيدى دارىگەر.
سونداي-اق جۇرەگىڭىز «قالتىراپ»، «توقتاپ قالعانداي» سەزىلسە، بۇل دا تەكسەرىلۋگە سەبەپ.
تاعى ەلەمەۋگە بولمايتىن بەلگىلەر:
-
وتىرعان كۇيدە تەرەڭ تىنىس الا الماۋ؛
-
تۇندە تۇنشىعۋ ۇستامالارى؛
-
ىڭعايلى ۇيىقتاۋ ءۇشىن قوسىمشا جاستىق قاجەت بولۋى؛
-
تۇشكىرۋ مەن جوتەلدىڭ جوعارىداعى بەلگىلەرمەن قاتار ءجۇرۋى.