شاردارا سۋ قويماسى ماڭىنان قۇندى تاريحي جادىگەرلەر تابىلدى، دەپ حابارلايدى almaty-akshamy.kz
قۋاڭشىلىققا بايلانىستى قويماداعى سۋ دەڭگەيىنىڭ تومەندەپ كەتۋ سالدارىنان مۇيىستەگى «اقتوبە-2» دەپ اتالاتىن ورىندا ءبىرقاتار ارتەفاكتىلەر توپىراقتىڭ بەتىنە شىعىپ قالعان. اۋداندىق تاريحي-ولكەتانۋ مۋزەيىنىڭ ۇيىمداستىرۋىمەن «اقتوبە-2» تاريحي تۇراعىندا ەكسپەديسيالىق قازبا جۇمىستارى جۇرگىزىلدى. ناتيجەسىندە قىش قۇمىرالار، تۇرمىستىق زاتتار، كىرپىشتەر مەن كارىز جۇيەلەرى، ءتىپتى ادامنىڭ سۇيەگى دە تابىلدى.
ارحەولوگتاردىڭ تۇجىرىمى بويىنشا، كونە زاتتار VI-VIII عاسىرلارعا تيەسىلى. تاريحشىلاردىڭ ايتۋىنشا، شاردارا ماڭىنان بۇعان دەيىن دە بىرنەشە قالاشىقتار مەن قورىمدار، قاراحانيد داۋىرىنە جاتاتىن قۇندى جادىگەرلەر تابىلعان. سوندىقتان ماماندار شاردارا اۋماعى قوسىمشا زەرتتەۋدى قاجەت ەتەتىنىن ايتادى. سوندا عانا كونە جادىگەرلەردىڭ كومبەسىنە اينالعان ورىنعا قاتىستى تىڭ دەرەكتەر پايدا بولۋى مۇمكىن.