ماجىلىسمەندەر قازاقتىڭ سپورتتىق جىلقى تۇقىمىن ساقتاۋعا جانە كوبەيتۋگە باعىتتالعان زاڭ جوباسىنىڭ تۇزەتۋلەرىن ماقۇلدادى
زاڭ جوباسىنىڭ نەگىزگى ماقساتى – وتاندىق سپورتتىق جىلقىلاردىڭ تۇقىمىن قالپىنا كەلتىرۋ جانە ولاردىڭ اسىل تۇقىمدىق قاسيەتتەرىن مەملەكەتتىك قولداۋ ارقىلى جاقسارتۋ.
تۇزەتۋلەر ق ر پارلامەنتى ءماجىلىسىنىڭ دەپۋتاتى، Respublica پارتياسى فراكسياسىنىڭ جەتەكشىسى ايداربەك قوجانازاروۆتىڭ باستاماسىمەن ۇسىنىلعان، دەپ حابارلايدى Almaty-akshamy.kz.
بىلتىر ماۋسىمدا دەپۋتات بۇل ماسەلەنى ءماجىلىستىڭ اگرارلىق ماسەلەلەر كوميتەتىنىڭ وتىرىسىندا كوتەرگەن.1969 جىلى ەلىمىزدە 44 مىڭنان استام «قوستاناي» جىلقى تۇقىمى تىركەلگەن، ياعني بارلىق اسىل تۇقىمدى جىلقىلاردىڭ جالپى سانىنىڭ 9،7 % قۇراعان. الايدا بۇگىندە «قوستاناي» جىلقى تۇقىمىنىڭ رەسمي تىركەلگەن سانى 270 باستان اسپايدى، ال «اداي» جىلقى تۇقىمىنىڭ 1300 باسى تىركەلگەن.
«قازاقستاندا ءسۇت جانە ەت باعىتىنداعى اسىل تۇقىمدى جىلقىلاردى ءوسىرۋ جاعىنان قولداۋ كورسەتىلەدى. ءبىراق ات سپورتى تۇرلەرىن دامىتۋعا ەشقانداي قولداۋ قاراستىرىلماعان. ەڭ وكىنىشتىسى، ۇلتتىق سپورت تۇرلەرىنەن ءبىزدىڭ سپورتشىلار قىرعىز، ورىس جانە باسقا ەلدەردەن ساتىپ الىنعان اتتاردى ءمىنىپ، ەڭ جۋيرىكتەرى وزبەكستانعا ساتىلىپ كەتەدى. وسىعان بايلانىستى ءبىز وتاندىق جىلقى تۇقىمىن ساقتاۋ مەن ءوسىمىن مولايتۋعا باعىتتالعان زاڭ جوباسىن ازىرلەۋ تۋرالى شەشىم قابىلدادىق. اتاپ ايتقاندا، ەكى تۇقىمدى ەرەكشە اتاپ وتەمىز: «قوستاناي» جانە «اداي»، ولار وزدەرىنىڭ قۇندىلىعىن دالەلدەگەن. اسىل تۇقىمدى جىلقىلاردى قولداۋ جانە ءوسىرۋ ارقىلى ۇلتتىق سپورتتى دامىتۋ قازاق مادەنيەتى مەن ءسالت-داستۇرىنىڭ دامۋىنا جاقسى سەرپىن بەرەدى»، – دەدى ايداربەك قوجانازاروۆ.
Respublica پارتياسىنىڭ پارلامەنتتىك فراكسياسى مەن ءبىر توپ پىكىرلەس دەپۋتاتتار باستاماشى بولعان زاڭ جوباسىمەن «اسىل تۇقىمدى مال شارۋاشىلىعى تۋرالى» جانە «سەلەكسيالىق جەتىستىكتەردى قورعاۋ تۋرالى» قازاقستان رەسپۋبليكاسىنىڭ زاڭدارىنا وزگەرىستەر مەن تولىقتىرۋلار ەنگىزىلەدى. تۇزەتۋلەر اسىل تۇقىمدى ورتالىقتاردىڭ شەتەلدىك سەلەكسيانىڭ سپورتتىق باعىتىنداعى اسىل تۇقىمدى ايعىرلاردى ساتىپ الۋ، اسىل تۇقىمدى انالىق مال باسىمەن سەلەكسيالىق-اسىل تۇقىمدىق جۇمىس جۇرگىزۋ، ولاردى ۇستاۋ بويىنشا شىعىنداردى وتەۋدى كوزدەيدى.
اتالعان قولداۋ تەتىكتەرى وتاندىق سپورتتىق باعىتتاعى جىلقى تۇقىمدارىن دامىتۋعا جاعداي جاساپ، بايگە، كوكپار، اۋدارىسپاق، جامبى اتۋ، تەڭگە الۋ سىندى ۇلتتىق ات سپورتى تۇرلەرىن بۇقارالىق دامىتۋعا ىقپالىن تيگىزەدى.