ءبىر پالاتالى پارلامەنت ۇلگىسى پەن مەملەكەتتىك ورگانداردىڭ جاڭارتىلعان جۇيەسىنە ارنالعان ەرەجەلەر جاڭا كونستيتۋسيا جوباسىنىڭ بىرنەشە بولىمدەرىنە ەنگىزىلدى، - دەپ حابارلايدى Aqshamnews.kz.
بۇل جونىندە كونستيتۋسيالىق كوميسسيانىڭ كەزەكتى وتىرىسىنداعى سوزىندە قازاقستان رەسپۋبليكاسى كونستيتۋسيالىق سوتى ءتوراعاسىنىڭ ورىنباسارى باقىت نۇرمۇحانوۆ مالىمدەدى. ونىڭ ايتۋىنشا، ءبىر پالاتالى پارلامەنت مودەلىنە ارنالعان نورمالار ءتورتىنشى «قۇرىلتاي» دەگەن بولىمدە جيناقتالدى. وندا زاڭ شىعارۋ ورگانىنىڭ وكىلەتتىكتەرى بەكىتىلدى، سونىمەن قاتار قۇرىلتايدىڭ سەسسيالارىنا جانە ونىڭ قىزمەتىن ۇيىمداستىرۋعا قاتىستى باپتاردىڭ بارلىعى دەرلىك جاڭارتىلدى.
«زاڭ شىعارۋ باستاماسى قۇقىعىنا يە سۋبەكتىلەردىڭ قاتارى انىقتالدى. قۇرىلتاي زاڭ قابىلداۋ ارقىلى رەتتەلەتىن اسا ماڭىزدى قوعامدىق قاتىناستاردىڭ تىزبەسى بەرىلدى. زاڭ جوبالارىن قاراۋ مەن قابىلداۋدىڭ راسىمدەرى كوزدەلدى. قۇرىلتاي ءتوراعاسىنىڭ لاۋازىمىنا قاتىستى ماسەلەلەر جەكە باپتا رەتتەلدى» - دەپ باقىت نۇرمۇحانوۆ اتاپ ءوتتى.
كونستيتۋسيا جوباسىنىڭ بەسىنشى ءبولىمى «ۇكىمەتكە» ارنالىپ وتىر.
«ءبىر پالاتالى قۇرىلتايعا كوشۋگە بايلانىستى كوپتەگەن ەرەجەلەر ناقتىلاندى. ولار ۇكىمەت پەن ونىڭ مۇشەلەرىنىڭ قۇرىلتاي الدىنداعى جاۋاپتىلىعى مەن ەسەپ بەرۋ، سەنىمسىزدىك ۆوتۋمىن ءبىلدىرۋ، قۇرىلتايعا زاڭ جوبالارىن ەنگىزۋ، رەسپۋبليكالىق بيۋدجەت جانە ونىڭ اتقارىلۋى تۋرالى ەسەپ بەرۋ ماسەلەلەرىنە بايلانىستى بولىپ وتىر»، - دەدى ول.
باقىت نۇرمۇحانوۆتىڭ سوزىنشە، التىنشى ءبولىم ەكى باپتان تۇرادى جانە قازاقستان حالىق كەڭەسىنە قاتىستى ماسەلەلەردى رەتتەيدى.
«قۇرامىنا ەل ازاماتتارى كىرەتىن بۇل جوعارى كونسۋلتاتيۆتىك ورگان قازاقستان حالقىنىڭ مۇددەسىن بىلدىرەدى. ونىڭ قۇرىلتايعا زاڭ جوبالارىن ەنگىزۋ، رەسپۋبليكالىق رەفەرەندۋم تاعايىنداۋ تۋرالى ۇسىنىسقا باستاما جاساۋ جانە باسقا دا ماڭىزدى وكىلەتتىكتەرى بەلگىلەندى»، - دەپ اتاپ ءوتتى.
جەكە، جەتىنشى بولىمدە «كونستيتۋسيالىق سوتقا» قاتىستى نورمالار شوعىرلاندىرىلدى. باقىت نۇرمۇحانوۆ كونستيتۋسيالىق سوتتىڭ قۇرامىنا، سۋديالاردىڭ وكىلەتتىك مەرزىمدەرىنە جانە قۇزىرىنا قاتىستى نورمالار نەگىزىنەن ساقتالعاندىعىن مالىمدەدى. وسى ورايدا كونستيتۋسيالىق سوتتىڭ كونستيتۋسيالىق باقىلاۋ جۇرگىزەتىن جانە بۇكىل ەل اۋماعىندا كونستيتۋسيانىڭ ۇستەمدىگىن قامتاماسىز ەتەتىن تاۋەلسىز مەملەكەتتىك ورگان رەتىندەگى ميسسياسى بەلگىلەندى.