تۋريزم باسقارماسى ۇلى كومپوزيتوردىڭ وتباسىمەن تىعىز جۇمىس جۇرگىزىپ جاتىر.
تۇركىستان وبلىسىندا ش.قالداياقوۆتىڭ ءومىر جولىنا ارنالعان اۆتورلىق تۋريستىك مارشرۋت دايىندالىپ جاتىر، دەپ حابارلايدى Almaty-akshamy.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
وتىرار اۋدانىندا «قازاق ءۆالسىنىڭ كورولى» اتانعان ءشامشى قالداياقوۆقا ارنالعان مۇراجاي ورنالاسقان. مۇراجايدا دارىن يەسىنىڭ جەكە زاتتارى مەن شىعارماشىلىققا باي قىزمەتى تۋرالى كۋالىكتەرى ساقتالعان.
تۋريزم باسقارماسى ۇلى كومپوزيتوردىڭ وتباسىمەن تىعىز جۇمىس جۇرگىزىپ، ونىڭ ءومىرى مەن شىعارماشىلىعىنان جاريالانباعان فاكتىلەردى اشاتىن اۆتورلىق جوبالاردى دايىنداۋ ۇستىندە. جاقىن ارادا تۇركىستاندا ءشامشى قالداياقوۆقا ارنالعان ونكۇندىك اياسىندا جۇرگىزىلەتىن ءىس-شارالار جوسپارى ۇسىنىلادى.