«قازاقستان» تەلەراديوكورپوراسياسى ۇلتتىق مادەنيەت پەن ونەر تاريحىنان سىر شەرتەتىن «شام تۇبىندەگى شىندىق» جاڭا تاريحي-درامالىق تەلەحيكاياسىن ۇسىنادى.
تەلەحيكايا قازاق تەاترىنىڭ 100 جىلدىعىنا ارنالعان. ءۇش ءبولىمدى سەريال ارقىلى كورەرمەندەر سول كەزدەگى استانا قىزىلوردا قالاسىندا 1925 جىلى قۇرىلعان تۇڭعىش ۇلتتىق قازاق تەاترىنىڭ تاريحىمەن، ونەر ورداسىنىڭ الماتىعا كوشىرىلۋى كەزىندەگى كورنەكتى رەجيسسەر جۇمات ءشانيننىڭ ەڭبەگىمەن تانىسادى، دەپ حابارلايدى aqshamnews.kz.
تاريحي تەلەحيكايادا 1927 جىلى ماسكەۋدە وتكەن ەتنوگرافيالىق كونسەرتتەگى قازاق زيالىلارىنىڭ ونەر كورسەتۋى جانە سول كەزدەگى قالىبەك قۋانىشبايەۆ، امىرە قاشاۋبايەۆ، كۇلاش بايسەيىتوۆا، سەركە قوجامقۇلوۆ باستاعان قازاق دەلەگاسياسى قۇرامىنداعى قايراتكەرلەردىڭ ءرولى جان-جاقتى كورسەتىلەدى.
تەلەحيكايانىڭ قويۋشى-رەجيسسەرى – جاسۇلان پوشانوۆ. باستى رولدەگى جۇمات ءشانيننىڭ جاس كەزىن عالىم وسپانوۆ، ەسەيگەن شاعىن ازامات ەسقۇلوۆ وينايدى. سەركە قوجامقۇلوۆتىڭ بەينەسىن جانداۋلەت باتاي، امىرە قاشاۋبايەۆتى ءبىرجان ءبازىلجانوۆ، قالىبەك قۋانىشبايەۆتى الماس شاياحمەتوۆ سومدايدى. ال كۇلاش بايسەيىتوۆانىڭ رولىندە كورەرمەن ينابات ريزابەكوۆانى كورە الادى.
تاريحي وقيعالارمەن قايتا قاۋىشتىراتىن تەلەحيكايا «Qazaqstan» تەلەارناسىنىڭ ەفيرىنەن 27 ناۋرىزدان باستاپ كورسەتىلەدى.