ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ باسپا ءسوز كونفەرەنسياسىندا قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ ەلدى مەكەندەردى اۋىزسۋمەن قامتۋ جانە ينجەنەرلىك جەلىلەردى جاڭعىرتۋ جۇمىستارىنىڭ بارىسى تۋرالى باياندادى، دەپ حابارلايدى aqshamnews.kz.
مەملەكەت باسشىسى قاسىم-جومارت توقايەۆتىڭ 2021 جىلعى 1 قىركۇيەكتەگى قازاقستان حالقىنا جولداۋىندا بەرگەن تاپسىرماسىنا سايكەس، 2025 جىلدىڭ سوڭىنا دەيىن بارلىق قالالار مەن اۋىلداردى 100% ساپالى اۋىزسۋمەن قامتاماسىز ەتۋ كوزدەلگەن.
بۇگىندە بۇل باعىتتاعى جۇمىستار قارقىندى جۇرگىزىلۋدە. كوميتەت ءتوراعاسى باقىتجان جۇنىسبەكوۆتىڭ ايتۋىنشا، سوڭعى جىلدارى اۋىزسۋمەن قامتۋ دەڭگەيى ايتارلىقتاي ارتقان. 2024 جىلدىڭ قورىتىندىسى بويىنشا، قالالاردا حالىقتىڭ 99،4%-ى، ال اۋىلداردا 97،8%-ى ورتالىقتاندىرىلعان سۋ جۇيەسىنە قوسىلعان.
«بۇل كورسەتكىشتەرگە قول جەتكىزۋ ءۇشىن رەسپۋبليكالىق بيۋدجەتتەن 1 ترلن تەڭگەدەن استام قاراجات ءبولىندى. اسىرەسە حالقى تىعىز ورنالاسقان اۋىلدارعا باسىمدىق بەرىلدى. ناتيجەسىندە 10 وڭىردەگى قالالار مەن ماڭعىستاۋ وبلىسىنىڭ اۋىلدارى تولىقتاي اۋىزسۋمەن قامتىلدى»، – اتاپ ءوتتى كوميتەت ءتوراعاسى.
2025 جىلعا دەيىن بۇل كورسەتكىشتى 100%-عا جەتكىزۋ ءۇشىن بيىل بيۋدجەتتەن قوسىمشا 176 ملرد تەڭگە ءبولىنىپ، 410 جوبا جۇزەگە اسىرىلادى. ونىڭ ىشىندە قالالاردا 89 جوباعا 71 ملرد تەڭگە، ال اۋىلداردا 321 جوباعا 106 ملرد تەڭگە قاراستىرىلعان.
حالقى از اۋىلداردا سۋدى ءتيىمدى جەتكىزۋ ءۇشىن شاعىن سۋ تازارتۋ مودۋلدەرى ورناتىلۋدا. الايدا، كەيبىر اۋىلداردا تۇرعىندار جەكە قۇدىقتارى مەن ۇڭعىمالارى بار بولعاندىقتان، ورتالىق سۋ جۇيەسىنە قوسىلۋدان باس تارتۋدا. وسىعان بايلانىستى جەرگىلىكتى اكىمدىكتەرمەن بىرلەسىپ، سۋ ساپاسىن تەكسەرۋ جۇمىستارى جۇرگىزىلۋدە»، – دەدى باقىتجان جۇنىسبەكوۆ.
سۋ ساپاسىنىڭ تۇراقتى بولۋى ينفراقۇرىلىمنىڭ توزۋ دەڭگەيىنە تىكەلەي بايلانىستى. قازاقستان بويىنشا سۋ قۇبىرلارىنىڭ جالپى ۇزىندىعى – 106،7 مىڭ شاقىرىم، ولاردىڭ توزۋ دەڭگەيى 39%-دى قۇرايدى.
ماسەلەنى تۇبەگەيلى شەشۋ ءۇشىن «ەنەرگەتيكا جانە كوممۋنالدىق سەكتوردى جاڭعىرتۋ» ۇلتتىق جوباسى قابىلداندى. بۇل جوبا اياسىندا 10 مىڭ شاقىرىم جەلى جاڭارتىلادى. ونىڭ ىشىندە 5 مىڭ شاقىرىم سۋ قۇبىرى جەلىلەرى جوندەۋدەن وتەدى.