كەز كەلگەن ادامنىڭ ابىرويعا ەڭبەكپەن جەتەتىنى بەلگىلى. بۇل ارادا ماسەلە مانسابىنىڭ جوعارى بولعانىندا ەمەس، ەتكەن ەڭبەگىنىڭ ادالدىعىندا. سودان دا بولار، اۆتوكولىككە قاجەتتى قوسالقى بولشەكتەر ساتاتىن بازاردىڭ ساتۋشىلارى دا، ساتىپ الۋشىلار دا گۇلشاتتى تەگىس تانيدى. انادايدان الدىمەن ارباسى، سوسىن ءوزى كورىنەتىن ءشاي ساتاتىن كەلىنشەكتى تۇراقتى كليەنتتەرى كۇتىپ الىپ، شىعارىپ سالىپ جاتادى. سوندا وسى گۇلشات دەگەن كىم ەدى دەيسىز عوي.
ول بازاردىڭ باسشىسى نەمەسە ەسەپشىسى، ءتىپتى تولىپ جاتقان لاۋازىمدى قىزمەتتىڭ ءبىرىنىڭ دە يەسى ەمەس. بار بولعانى تاڭنان كەشكە دەيىن ءشاي ساتىپ، ءناپاقاسىن ايىرىپ جۇرگەن كوپ قازاق ايەلدەرىنىڭ ءبىرى. گۇلشاتتىڭ كەرەك دەسەڭىز، الىپ بازاردا بەلىن جازىپ، دەمالىپ وتىراتىن ورنى دا جوق. جاز بويى بازارداعىلار گۇلشاتتىڭ شايىمەن ءشولىن باسسا، قىستا بويىن جىلىتادى. ەڭبەكقور كەلىنشەك ۇلكەن ارباسىن تولتىرىپ الىپ، بۇكىل بازاردى ارالاپ شىعام دەگەنشە، ءتۇس اۋىپ، كەش باتادى. وسىلايشا توڭىرەگىندەگىلەردىڭ العىسىنا بولەنىپ جۇرگەن ەڭبەكقور گۇلشاتقا كورسەتىلەتىن قۇرمەت بازار باسشىسىنان ارتىق بولماسا، ەش كەم ەمەس.
گۇلشاتتىڭ وتباسى وسىدان ءۇش-تورت جىل بۇرىن اۋىلدان قالاعا كوشىپ كەلگەن ەدى. بىردەن مۇندا ورنىعىپ، ۇيرەنىسىپ كەتۋ دە وڭايعا تۇسپەدى. اسىرەسە، باسپانا تابۋ ماسەلەسى قيىننىڭ-قيىنى ەكەن. جەكەمەنشىك ۇيلەردى جاعالاپ، پاتەر ىزدەگەن كۇندەرىن قالاي ۇمىتسىن؟ ءۇش بالاسىنىڭ بار ەكەنىن كورگەندە ءۇي يەلەرى بىردەن باستارىن شايقاپ، جولاتقىلارى كەلمەيدى. وسى بازاردىڭ ماڭايىنا تۇنەپ قالعان دا كەزدەرى بولعان. وندايدا بالالارىنىڭ «اۋىلعا قايتايىقشى، بىزگە قالا كەرەك ەمەس» دەپ تالاي جىلاعانى ەسىندە. كىم ويلاعان ۇلكەن قالادان پاتەر تاۋىپ، قونىستانۋدىڭ وڭايعا تۇسپەيتىنىن. اقىرىندا، ءبىر كىشكەنتاي بۇرىشتى تاپتى-اۋ. بۇلارعا ءۇي يەسىمەن تۇراتىن ەسكى ءۇيدىڭ ءبىر بولمەسى بۇيىردى.
كوپ ۇزاماي گۇلشات بازارعا شىعىپ، ءشاي ساتۋدى كاسىپكە اينالدىرسا، كۇيەۋى نۇرلان دوڭگەلەك اۋىستىرۋشىنىڭ كومەكشىسى بولىپ شىعا كەلدى. بۇرىن بازاردا ونى-مۇنى ساتىپ جۇرگەندەردى كورگەندە ىشتەي «وسىدان بىردەڭە تۇسەر دەيمىسىڭ» دەۋشى ەدى. قاراپ وتىرسا، تيىننان تەڭگە قۇرالادى ەكەن. العاشقى كۇنى-اق اجەپتەۋىر تيىن-تەبەن جاساپ، ساۋدانىڭ ءدامىن الدى. تۇسكەن اقشاعا كوتەرمە ساۋدا بازارىنا بارىپ، ەكى قوراپ ءشاي، قويۋ ءسۇت، كوفە، ءبىر رەتتىك پلاستماسسا ىدىستار، قاسىق، سۋلىق سياقتى قاجەتتى مايلىقتاردى ساتىپ الدى. ۇيدەگى بالاقايلارىنا ءتاتتى-پاتتى الۋدى دا ۇمىتقان جوق. وسىلايشا ايى وڭىنان تۋىپ، شارۋاسى دوڭگەلەنە باستاعان تۇستا ءۇي يەسىنىڭ «ءۇيدى بوساتىڭدار، باسپانامدى ساتام» دەگەنى بار ەمەس پە؟ شاھارلى جەردە تۋىسى تۇگىل، تانىسى جوق جاس وتباسىنىڭ باسىنا بۇلت ءۇيىرىلدى. كىمگە بارىپ كومەك سۇراسىن. اينالاسى ءۇش ايدىڭ ىشىندە بۇل باسپاناعا دا ۇيرەنىپ قالىپتى. «جازعان قۇلدا شارشاۋ جوق» دەمەكشى، اقىرى تۋعان ۇيىنەن كەتىپ بارا جاتقانداي قيماستىقپەن قوشتاسىپ، ەكى-ۇش تۇيىنشەگىن ارباسىنا تاڭىپ، باسپانا ىزدەۋگە شىعادى. دەگەنمەن، قاق- سوقپەن ءىسى جوق، ادال ەڭبەكپەن كۇن كورىپ جۇرگەن ەرلى-زايىپتىلارعا ءتاڭىردىڭ ءوزى قولۇشىن بەرگىسى كەلدى مە، توسىننان باسپانانىڭ تابىلا كەتكەنى. وسى بازاردا كولىككە قاجەتتى تەمىر تەتىكتەرىن ساتاتىن مۇحتار ەسىمدى ەل اعاسى گۇلشاتتىڭ كوڭىلسىز ءتۇرىن كورىپ، ءجون سۇراسا كەتتى.
– مىنا بالالاردى نەگە ۇيىڭە قالدىرىپ كەتپەيسىڭ؟ بازاردا ساپىرىلىسقان حالىق، ءبىرى بولماسا ءبىرى قاعىپ كەتۋى ابدەن مۇمكىن عوي. جازىم دەگەن اياقاستىنان، تەمىر-تەرسەك ءتۇسىپ كەتسە قايتەسىڭ، – دەپ جاناشىرلىق تانىتادى. ەكى كۇننەن كەيىن مۇحتار اعاسى گۇلشاتتىڭ قولىنا باسپانا كىلتىن ۇسىنىپ، الىستاۋ بولسا دا پانالاي تۇرۋعا كەڭەس بەرەدى. سول كۇنى- اق نۇرلان مەن گۇلشات يەسىز ءۇيدى الاستاپ، ءىشى-سىرتىن اقتاپ، كىرىپ الادى. «ءوز ءۇيىم – ولەڭ توسەگىم» دەگەن وسى شىعار. ەكى بولمەنىڭ ءىشى شاتتىققا تولىپ شىعا كەلدى.
ءقازىر گۇلشاتتىڭ وتباسىنان باقىتتى ەشكىم جوق شىعار. ەرلى-زايىپتىنىڭ ەسكى بولسا دا، كولىگى بار. ەڭ باستىسى، ەكەۋىنىڭ دە ءناپاقا تاۋىپ وتىرعان جۇمىسى بار. كۇندە جۇمىسقا اسىققان گۇلشات ءۇش تەرموستى ىستىق سۋعا تولتىرىپ الادى. قانتى، ءتاتتى توقاشى تاعى بار. سوسىن تۇسكە قاراي ۇيىنە ءبىر سوعىپ، بالالارىن تاماقتاندىرىپ قايتا كەتەدى. سوڭعى كەزدەرى بازارداعى اسحانا مەڭگەرۋشىسىمەن كەلىسىپ، ىستىق سۋدى سول جاقتان الاتىن بولعان. ءارى سول اسحانا پىسىرەتىن باۋىرساق، سامسا، بالىشتەردى قوسا ساتادى. ءوزىنىڭ دە، اسحانانىڭ دا ساۋداسىن جۇرگىزىپ ءجۇر. وسىلايشا گۇلشاتتىڭ قويۋ كۇرەڭ ءشايى مەن ىستىق بالىشىنەن سوڭ، بازارشىلاردىڭ دا جۇمىسى دوڭگەلەنىپ جۇرە بەرەدى.
گۇلشاتتىڭ ايتۋىنشا، ءوزى كوپبالالى وتباسىنان شىققان. جولداسى دا ءبىر وتباسىنىڭ ورتانشى ۇلى ەكەن. وسى جازدا شاعىن جەر تەلىمىن ساتىپ الىپتى. ءساتىن سالسا، كوكتەمدە ءۇي سالۋ ويلارىندا بار. ءقازىر ەكەۋلەپ قارجى جيناپ جۇرگەن سىڭايلى. ەڭ باستىسى، ادال ەڭبەكپەن نانىن تاۋىپ جۇرگەن وتباسىنىڭ ۇيقىسى تىنىش. ەڭبەك ادامى وسىلاي بولسا كەرەك.