بۇگىن شاحتينسك قالاسىندا لەنين اتىنداعى شاحتادا قازا تاپقان كەنشىلەردى جەرلەۋ ءراسىمى ءوتتى. مارقۇمداردىڭ تۋىستارى مەن جاقىندارى ولاردى سوڭعى ساپارعا شىعارىپ سالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
شاحتينسك قالاسىندا لەنين اتىنداعى شاحتاداعى اپات كەزىندە قازا تاپقان بەس كەنشى جەرلەندى. تۋىستارى مەن جاقىندارى، ارىپتەستەرى جانە قالا تۇرعىندارى مارقۇمداردى سوڭعى ساپارعا شىعارىپ سالدى.
ەستەرىڭىزگە سالا كەتەيىك، 3 قاراشادا تۇنگى ساعات 3.03-تە «ارسەلورميتتال تەمىرتاۋ» اق كومىر دەپارتامەنتىنىڭ لەنين اتىنداعى شاحتاسىندا مەتان گازى جارىلعان. اپات كەزىندە شاحتادا جەر استىندا 106 ادام بولعان. 101 ادام ەۆاكۋاسيالاندى، بەس ادام قايتىس بولدى، ءتورت ادام اۋرۋحاناعا جاتقىزىلدى. ق ر قك 277-بابى 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بويىنشا قىلمىستىق ءىس قوزعالدى. ساناۆياسيا بريگاداسى زارداپ شەككەندەردىڭ جاعدايى بويىنشا تج ورنىندا كونسيليۋم قۇرىپ، ەكى كەنشى قاراعاندىعا جەتكىزىلىپ، وتا جاسالدى. كەيىن «ارسەلورميتتال تەمىرتاۋ» اق كومىر دەپارتامەنتىنىڭ ديرەكتورى ارمان قالىقوۆ لەنين اتىنداعى شاحتاداعى اپاتتىڭ سەبەبىن اتادى. ونىڭ ايتۋىنشا، گازدى درەناجدى ۇڭعىمالاردى بۇرعىلاۋ كەزىندە مەتاننىڭ كەنەتتەن شىعۋى ورىن العان.
«ارسەلورميتتال تەمىرتاۋ» اق-نىڭ بارلىق سەگىز شاحتاسى ءبىر تاۋلىككە توقتاتىلدى.
كەيىنىرەك قايتىس بولعانداردىڭ ەسىمدەرى بەلگىلى بولدى.
سۋرەت: Inform.kz