بۋداپەشت قالاسىندا 45ء-شى شاحمات وليمپياداسى (45th FIDE Chess Olympiad) وتۋدە.
بۇل حالىقارالىق تۋرنيرگە الەمنىڭ 180-نەن استام ەلىنەن شاحماتشىلار قاتىسۋدا. ولاردىڭ قاتارىندا قازاقستاننىڭ ايەلدەر جانە ەرلەر قۇرامالارى دا بار، دەپ حابارلايدى aqshamnews.kz.
ءبىرىنشى تۋردا قازاقستاننىڭ ايەلدەر قۇراماسى (مەرۋەرت كاماليدەنوۆا، كسەنيا بالابايەۆا، الۋا نۇرمان جانە امينا قايىربەكوۆا) ۋرۋگۆاي كومانداسىن 4-0 ەسەبىمەن ايقىن باسىمدىقپەن جەڭىسكە جەتتى.
ەرلەر قۇراماسى (قازىبەك نوگەربەك، الىشەر سۇلەيمەنوۆ، رامازان ءجالمۇحانوۆ جانە الديار انسات) سۋرينام قۇراماسىنان ءدال وسىنداي ەسەپپەن باسىم ءتۇستى.
ەكىنشى تۋردا قازاقستان قۇرامالارى ءۇشىن ناتيجە ءسال كۇردەلىرەك بولدى. ايەلدەر قۇراماسى فينليانديا كومانداسىمەن كەزدەستى. ويىن بارىسىندا ءبيبىسارا اساۋبايەۆا اناستاسيا كەينانەنمەن تەڭ ءتۇستى. ال الۋا نۇرمان ليلا بەدەردينگە ەسە جىبەردى. دەگەنمەن، كسەنيا بالابايەۆا مەن امينا قايىربەكوۆا جەڭىسكە جەتىپ، تۋر ناتيجەسى 2½-1½ بولىپ قازاقستاننىڭ پايداسىنا شەشىلدى.
ەرلەر قۇراماسى ەكىنشى تۋردا موناكو قۇراماسىن 3½–½ ەسەبىمەن جەڭدى. دەنيس ءماحنوۆ امير باگەريمەن تەڭ ويناسا، الىشەر سۇلەيمەنوۆ، رامازان ءجالمۇحانوۆ جانە الديار انسات قارسىلاستارىنا مات قويدى.
ءۇشىنشى تۋردا قازاقستاننىڭ ەرلەر قۇراماسى ۆەتنام قۇراماسىمەن، ال ايەلدەر قۇراماسى اۆستريا قۇراماسىمەن ب ا ق سىنايتىن بولادى.
كەرەك دەرەك
شاحمات وليمپياداسى – بۇل شاحماتتىڭ حالىقارالىق ارەناداعى ەڭ بەدەلدى جارىستارىنىڭ ءبىرى. FIDE (حالىقارالىق شاحمات فەدەراسياسى) ۇيىمداستىراتىن بۇل تۋرنير العاش رەت 1927 جىلى لوندوندا ءوتتى. بۇگىنگى كۇنى شاحمات وليمپياداسى ءار ەكى جىل سايىن وتكىزىلىپ، الەمنىڭ تۇكپىر-تۇكپىرىنەن جينالعان مىقتى شاحماتشىلارى ب ا ق سىنايدى. قازاقستان قۇراماسى دا بۇل تۋرنيردە بىرنەشە رەت ءساتتى ونەر كورسەتىپ، ەلىمىزدىڭ نامىسىن قورعاۋدا.
شاحمات وليمپياداسى تەك كوماندالىق جارىس ەمەس، سونىمەن قاتار شاحمات مادەنيەتىن ناسيحاتتاۋ، ەلدەر اراسىنداعى ىنتىماقتاستىقتى نىعايتۋ جانە شاحماتتىڭ دامۋىنا ۇلەس قوسۋ ماقساتىنداعى ماڭىزدى شارالاردىڭ ءبىرى بولىپ تابىلادى.
ەسكە سالايىق بۇعان دەيىن شاحماتتان وتەتىن 45ء-شى وليمپياداعا ەل قۇراماسىنان كىمدەر باراتىنى جايىندا جازعان بولاتىنبىز.