قالاداعى 207 جالپى ءبىلىم بەرۋ مەكەمەسى بەينەباقىلاۋ جۇيەسىمەن جابدىقتالعان.
الماتى پوليسەيلەرى قالاداعى بارلىق مەكتەپكە بەينەكامەرا ورناتىلاتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتىدا قالالىق پوليسيا دەپارتامەنتىنىڭ باستىعى ارىستانعاني زاپپاروۆتىڭ توراعالىعىمەن جيىن ءوتتى. كەڭەس بارىسىندا پوليسەيلەر مەكتەپ وقۋشىلارىنىڭ قاۋىپسىزدىگىن تالقىلادى.
ارىستانعاني زاپپاروۆتىڭ ايتۋىنشا، الماتىداعى بارلىق 207 جالپى ءبىلىم بەرۋ مەكەمەسى بەينەباقىلاۋ جۇيەسىمەن جابدىقتالعان.
«مەكتەپ وقۋشىلارىنىڭ قاۋىپسىزدىگى ءبىلىم بەرۋ مەكەمەلەرى اكىمشىلىگىنىڭ باستى مىندەتى ەكەندىگى ءسوزسىز، ءبىراق ءبىز دە شەتتە قالماۋىمىز كەرەك. بالالاردىڭ قاۋىپسىزدىگىن قامتاماسىز ەتۋ ماڭىزدى باعىتتاردىڭ ءبىرى ەكەندىگىن جانە وسى باعىتتا جۇمىس ىستەۋىمىز قاجەتتىگىن اتاپ وتكىم كەلەدى. قالادا 207 جالپى ءبىلىم بەرۋ مەكەمەسى بار، ولاردىڭ بارلىعى بەينەباقىلاۋ جۇيەسىمەن جابدىقتالعان، ياعني 4 960 بەينەكامەرا ورناتىلدى. ارينە، مەكتەپتەردە بەينەباقىلاۋ كامەرالارىنىڭ بولۋى قۇقىق بۇزۋشىلىقتىڭ الدىن الۋعا وڭ اسەرىن تيگىزەدى، ال ولاردىڭ جەدەل باسقارۋ ورتالىعىنا قوسىلۋى زاڭسىز سيپاتتاعى ءتۇرلى كورىنىستەرگە جەدەل دەن قويۋعا مۇمكىندىك بەرەدى»، – دەدى ارىستانعاني زاپپاروۆ.
سونىمەن قاتار، ول مەكتەپتەردىڭ تەرروريستىك تۇرعىدان وسال ۇيىمداردىڭ تىزىمىنە ەنگىزىلگەنىن ەسكە سالدى. سوندىقتان ءبىلىم مەكەمەلەرىن تاجىريبەسى دە، ماتەريالدىق رەسۋرستارى دا بار، قىزمەتكەرلەردى وقىتۋعا قاتاڭ تالاپتار قوياتىن كۇزەت كومپانيالارى قورعاۋى كەرەك.
«ابىروي بولعاندا، بىلتىرعى وقۋ جىلىندا مەكتەپتەردە ەشقانداي قۇقىقبۇزۋشىلىق بولعان جوق. مەكتەپ وقۋشىلارى اراسىنداعى قىلمىس دەڭگەيىنىڭ تومەندەۋ تەندەنسياسىن جالعاستىرۋ ءۇشىن، ەسەپتە تۇرعان قيىن جاسوسپىرىمدەرمەن جانە ولاردىڭ اتا-انالارىمەن ماقساتتى جۇمىستى جالعاستىرۋ قاجەت. قۇقىقبۇزۋشىلىق پەن وز-وزىنە قول جۇمساۋعا بەيىم جاسوسپىرىمدەردى انىقتاۋ، قاجەتتى مامانداردى تارتا وتىرىپ، ولارمەن جەكە پروفيلاكتيكالىق جۇمىستاردى جۇرگىزۋ جۇمىستارىن جالعاستىرۋ. تاعى ءبىر ايتا كەتەرلىگى، وقۋ جىلىنىڭ باستالۋ قارساڭىندا مەكتەپتەر ماڭىندا كولىك قوزعالىسى قيىندايدى. 31 مىڭنان استام ءبۇلدىرشىن ءبىرىنشى سىنىپقا بارادى. ءبىز ولاردىڭ قاۋىپسىزدىگىن ءتيىستى دەڭگەيدە قامتاماسىز ەتۋ ءۇشىن بار كۇش-جىگەرىمىزدى سالۋىمىز كەرەك»، – دەدى ول.
ايتا كەتەيىك، الماتى پوليسياسى جازعى دەمالىس كەزىندە «دەمالىس»، «ءجاسوسپىرىم» جانە «تۇنگى قالاداعى بالالار» اتتى ءۇش اۋقىمدى ءىس-شارا جۇرگىزدى، ناتيجەسىندە كامەلەتكە تولماعانداردىڭ ۇيلەرىنەن تىس جەردە ءجۇرۋىنىڭ 2 مىڭنان استام دەرەگى انىقتالدى.