الماتىدا پارسى ءتىلىن وقىتۋ كۋرسىن ءساتتى اياقتاعان قاتىسۋشىلار سەرتيفيكاتقا يە بولدى. اتالمىش كۋرس «عىلىم ورداسى» مەن يران يسلام رەسپۋبليكاسىنىڭ باس كونسۋلدىعى جانىنداعى «مادەني ورتالىقتىڭ» ءوزارا ىنتىماقتاستىق تۋرالى مەموراندۋم اياسىندا ۇيىمداستىرىلعان ەدى. سەرتيفيكاتتى تابىس ەتۋ سالتاناتىنا «عىلىم ورداسى» باس ديرەكتورى ۇلار مۇقاجانوۆ، ديرەكتوردىڭ ورىنباسارى ازامات نۇرشانوۆ، يران يسلام رەسپۋبليكاسىنىڭ الماتى قالاسىنداعى باس كونسۋلى سۋنا احمادي، باس كونسۋلدىق جانىنداعى مادەني وكىلدىكتىڭ باسشىسى حۇسەين اعازادە قاتىستى.
سالتاناتتى جيىندا ءسوز العان ۇلار مۇقاجانوۆ قازاقستان مەن يران اراسىنداعى ىنتىماقتاستىقتىڭ ماڭىزدىلىعىنا توقتالدى.
ەكى ەل اراسىندا ارىپتەستىك ورناتىلىپ، سيرەك كىتاپتار مەن قولجازبا دەرەكتەردى رەستاۆراسيالاۋ جانە كونسەرۆاسيالاۋ سالالارىندا كاسىبي تاجىريبە الماسۋ، عىلىمي زەرتتەۋلەر جۇرگىزۋ، كادر دايارلاۋ باعىتىندا مەموراندۋمدارعا قول قويىلدى. بۇل باستامالار حالىقارالىق مادەني ىنتىماقتاستىقتى تەرەڭدەتىپ، عىلىم ورداسىنىڭ قىزمەتىن جاڭا دەڭگەيگە كوتەرۋگە باعىتتالعان. سونىمەن قاتار، مەكەمە قىزمەتكەرلەرىنە تەگىن تىلدىك كۋرستار ۇيىمداستىرىلىپ، ولاردىڭ كاسىبي الەۋەتىن ارتتىرۋ، تاجىريبە الماسۋعا جاعداي جاساۋ كوزدەلىپ وتىر. بۇل قادام قازاقستان مەن يران اراسىنداعى رۋحاني بايلانىستى نىعايتۋعا تىڭ سەرپىن بەرەتىنى ءسوزسىز»، – دەدى.
يران يسلام رەسپۋبليكاسى كونسۋلدىعىنىڭ وكىلدەرى سۋنا احمادي مەن حۇسەين اعازادە قازاقستان مەن يران اراسىنداعى مادەني جانە ءبىلىم بەرۋ سالالارىنداعى ىنتىماقتاستىقتىڭ تۇراقتى تۇردە دامىپ كەلە جاتقانىن تىلگە تيەك ەتتى.
كۋرس تىڭداۋشىلارى كورسەتىلگەن قولداۋ مەن مۇمكىندىكتەر ءۇشىن يران مادەني ورتالىعى مەن عىلىم ورداسىنا العىستارىن ءبىلدىرىپ، پارسى تىلىندە ولەڭدەر وقىپ، «ەي يران» جانە «بۋيە دجۋيە مۋليون ءوياد ھامي» اتتى ءاندى ورىندادى.
