گيك-مادەنيەت فەستيۆالى اياسىندا «انيمە دۋبلياجى: قازاقشا داببينگ» اتتى شەبەرلىك ساباعى ءوتتى. ءىس-شارانى Anidybys دۋبلياج ستۋدياسى بلوگەر DickThor-پەن بىرلەسىپ ۇيىمداستىردى.
ءىس-شارا قازاق تىلىندە ءوتتى جانە دۋبلياجعا، انيمە لوكاليزاسياسىنا قىزىعاتىن جاستاردى، شىعارماشىلىق ماماندىقتار بويىنشا ءبىلىم الىپ جاتقان ستۋدەنتتەردى، سونداي-اق بولاشاق دۋبلياج اكتەرلەرىن جينادى، دەپ حابارلايدى aqshamnews.kz.
ۇيىمداستىرۋشىلاردىڭ ايتۋىنشا، شەبەرلىك ساعاتىنا جوعارى قىزىعۋشىلىق ءقازاقتىلدى دۋبلياجعا دەگەن سۇرانىستىڭ ارتقانىن جانە بۇل باعىتتىڭ جاستار اراسىندا وزەكتى ەكەنىن كورسەتتى. قاتىسۋشىلار كاسىبي كەڭەستەر تىڭداپ قانا قويماي، دۋبلياج اكتەرى ءرولىن وزدەرى سىناپ كورۋ مۇمكىندىگىنە يە بولدى.
شەبەرلىك ساباعى اياسىندا ءسوز سويلەگەن Anidybys ستۋدياسىنىڭ نەگىزىن قالاۋشى، كينونىڭ دىبىس رەجيسسەرى، دۋبلياج رەجيسسەرى جانە اكتەرى دياس بالابي دۋبلياج جاساۋ ۇدەرىسى، كادر سىرتىنداعى جانە سينحروندى دىبىستاۋ ايىرماشىلىقتارى، سونداي-اق انيمەنى قازاق تىلىنە بەيىمدەۋ ەرەكشەلىكتەرى تۋرالى جان-جاقتى ايتىپ بەردى. سونىمەن قاتار، قاتىسۋشىلارعا تاجىريبەلىك ساباق وتكىزدى.
«ءبىز انيمەنى جاي عانا دۋبلياجدامايمىز، ءبىز قازاق ءتىلدى مەديامازمۇندى جاسايمىز. قازاق ءتىلى زاماناۋي، جاستارعا جاقىن كونتەكستە ەستىلۋى ءتيىس. انيمە – وسى باعىتتاعى تاماشا مۇمكىندىك. مۇندا ىنتالى، تالانتتى جاستاردىڭ كوپ بولعانىنا قۋانىشتىمىن»، – دەدى دياس بالابي.
Comic Con Astana–2025 13 شىلدەگە دەيىن قازاقستان استاناسىندا جالعاسادى.
باعدارلاماداعى ءداستۇرلى ەلەمەنتتەردىڭ ءبىرى – جالپى جۇلدە قورى 15 ميلليون تەڭگەنى قۇرايتىن حالىقارالىق كوسپلەي بايقاۋى. قازىلار القاسىنىڭ قۇرامىندا: يايا حان (اقش)، Cinderys (فرانسيا)، RanHime (قىرعىزستان)، FrauHaku (رەسەي)، Ainaven Elf! (قازاقستان)، Danik (قازاقستان)، MiddayofSiberia (رەسەي) جانە باسقالار بار.
فەستيۆالدىڭ باستى حەدلاينەرلەرى - گولليۆۋدتىق اكتەرلەر ەندي سەركيس، ەساي مورالەس جانە سكوتت ەدكينس. ارنايى شاقىرىلعان قوناقتاردىڭ قاتارىندا Marmok، Qewbite، انتون ميلس، Johan، EugeneSagaz، ناستيا دجەكسون جانە Metal Family بار.
Comic Con Astana-2025 استانا اكىمدىگى مەن «AstanaTourism» ءتۋريزمدى دامىتۋ ورتالىعىنىڭ قولداۋىمەن ۇيىمداستىرىلۋدا.