الماتى قالاسىندا قازاق ۇلتتىق قىزدار پەداگوگيكالىق ۋنيۆەرسيتەتىندە كۇردەلى جوندەۋدەن وتكەن عىلىمي كىتاپحانانىڭ سالتاناتتى اشىلۋ ءراسىمى ءوتتى.
ۇلتتىق ءبىلىم مەن عىلىم سالاسىنا وراسان زور ۇلەس قوسقان عالىم، پەداگوگ سەرالى قانييەۆتىڭ اتىنا بەرىلگەن بۇل كىتاپحانا تەك ءبىلىم بەرۋ ورنى عانا ەمەس، زامان تالابىنا ساي مادەني ورتالىققا اينالماق.
اشىلۋ سالتاناتىنا ق ر عىلىم جانە جوعارى ءبىلىم ءمينيسترى ساياسات نۇربەك، الماتى قالاسىنىڭ اكىمى ەربولات دوسايەۆ، سەرالى قانييەۆتىڭ تۋىستارى مەن ۋنيۆەرسيتەت ارداگەرلەرى قاتىستى. الماتى اكىمى ەربولات دوسايەۆ اتاپ وتكەندەي، بۇل كىتاپحانا – تەك كىتاپ قويماسى ەمەس، ءبىلىم مەن مادەنيەتتىڭ وشاعى. ونىڭ ايتۋىنشا، كىتاپحانا جوعارى حالىقارالىق ستاندارتتارعا ساي جاسالعان، ال سەرالى قانييەۆتىڭ ەسىمىن يەلەنۋى – ۋنيۆەرسيتەت ءۇشىن ۇلكەن مارتەبە.
«بۇگىنگى ستۋدەنتتەرگە سەرالى اعامىزدىڭ جولىن ۇستانىپ، بىلىمگە ادالدىق تانىتۋىنا تىلەكتەسپىن»، – دەدى اكىم.
مينيستر ساياسات نۇربەك تە ءبىلىم مەكەمەلەرىندە كىتاپحانالاردىڭ ورنى ەرەكشە ەكەندىگىن اتاپ ءوتىپ، كىتاپ وقۋ مەن جازۋ مادەنيەتىنىڭ قۇندى ەكەنىنە توقتالدى.
«قازىرگى زاماندا كىتاپحانالار ءبىلىم الۋ عانا ەمەس، ۇلكەن الەۋمەتتىك ورتالىققا اينالۋى ءتيىس. مۇنداي كىتاپحانالاردىڭ بولۋى وقۋ مادەنيەتىن ارتتىرۋعا سەپتىگىن تيگىزەدى»، – دەدى مينيستر.
سەرالى قاني ۇلى – ەلىمىزدىڭ ءبىلىم جانە عىلىم سالاسىندا تانىمال تۇلعا. ول فيزيكا-ماتەماتيكا عىلىمدارىنىڭ كانديداتى، قازاق سسر اعارتۋ ءىسىنىڭ ۇزدىگى، ەڭبەك ارداگەرى، كسرو جوعارعى مەكتەبىنىڭ ۇزدىگى اتانعان. 40 جىلعا جۋىق قىزمەتىندە سەرالى قانييەۆ كوپتەگەن ستۋدەنتتەرگە ءبىلىم بەرىپ، عىلىمي ەڭبەكتەر جازۋمەن قاتار قازاق تىلىندەگى ماتەماتيكا وقۋلىقتارىن اۋدارۋعا جانە جازۋعا اتسالىستى.
جاڭا كىتاپحانا قازىرگى زامانعى تەحنولوگيالارمەن جابدىقتالعان جانە ستۋدەنتتەر، وقىتۋشىلار، زەرتتەۋشىلەر ءۇشىن كەڭىنەن قولجەتىمدى. مۇندا عىلىمي قورلارمەن جۇمىس جاساۋ، زەرتتەۋ جۇرگىزۋ ءۇشىن بارلىق جاعداي قاراستىرىلعان. اشىلۋ راسىمىندە ۇستاز سەرالى قانييەۆتىڭ ءومىرى مەن قىزمەتى جايلى بەينەفيلم كورسەتىلىپ، ارداگەر ۇستازدار ونىڭ شاكىرتتەرى مەن ءىزباسارلارىنا قالدىرعان مۇراسى تۋرالى ەستەلىكتەرىن ءبولىستى.