ق ر پرەمەر-مينيسترىنىڭ ءبىرىنشى ورىنباسارى رومان سكليار كومىر وندىرۋگە جانە وڭدەۋگە ماماندانعان ءىرى ەنەرگەتيكالىق كومپانيا – «China Energy Investment Corporation» باسشىلىعىمەن كەزدەسۋ وتكىزدى، دەپ حابارلايدى aqshamnews.kz.
كەزدەسۋ بارىسىندا تاراپتار كومىر حيمياسى سالاسىنداعى ىنتىماقتاستىقتىڭ كەلەشەگىن جانە قازاقستاندا ينۆەستيسيالىق جوبالاردى ىسكە اسىرۋ مۇمكىندىكتەرىن تالقىلادى.
«China Energy Investment Corporation» وندىرىستىك قۋاتى جىلىنا 650 ملن توننا بولاتىن 97 كومىر شاحتاسىن باسقارادى جانە الەمدىك نارىقتا جەتەكشى ورىن الادى. بۇگىنگى تاڭدا كومپانيانىڭ شەتەلدىك اكتيۆتەرى جۇڭگو، وڭتۇستىك افريكا، اۆستراليا، يندونەزيا، گرەسيا جانە گەرمانيادا ورنالاسقان.
يان گوچۋن مىرزا، CHN Energy Investment Corporation Group Co. Ltd، كومپانياسىنىڭ باس ديرەكتورىنىڭ ورىنباسارى قازاقستان اۋماعىندا كومىر-حيميا ءوندىرىسىن دامىتۋعا جوعارى قىزىعۋشىلىق تانىتتى، بۇل ەلدىڭ ەكونوميكالىق الەۋەتىن كەڭەيتۋدەگى ماڭىزدى قادام بولۋى مۇمكىن.
اتالعان ىنتىماقتاستىق ەكى تاراپ ءۇشىن دە ايتارلىقتاي مۇمكىندىكتەر اشادى، وڭدەۋ ونەركاسىبى سالاسىندا قىتايمەن ەكىجاقتى قاتىناستاردى نىعايتۋعا ىقپال ەتەدى.