الماتى قالاسىنىڭ اكىمدىگى مەملەكەتتىك ساتىپ الۋلارعا قاتىساتىن مەردىگەر ۇيىمدارعا قويىلاتىن تالاپتاردى قاتاڭداتادى. قالا بيلىگى مەرزىمدى بۇزاتىن، ستاندارتتى ساقتامايتىن، ءوز مىندەتىن ورىندامايتىن كومپانيالاردى جۇمىسقا ارالاستىرماۋدى كوزدەپ وتىر.
باقىلاۋدى كۇشەيتۋمەن قاتار، رەسپۋبليكا دەڭگەيىندە ساتىپ الۋ ەرەجەلەرىنە وزگەرىستەر ەنگىزىلدى، بۇل كەزدەيسوق جانە ءالسىز كومپانيالاردى تەندەردەن شەتتەتۋگە مۇمكىندىك بەرمەك. سونىمەن قاتار، سەنىمسىز جەتكىزۋشىلەرگە ايىپپۇل سالىپ، شەكتەۋدى قاتاڭداتۋدى كوزدەيتىن ۇسىنىس جاساپ جاتىر. وڭىرلىك كوممۋنيكاسيالار قىزمەتىندەگى باسپا ءسوز ءماسليحاتىندا وسىنداي وي ايتىلدى.
«ءبىز ادال بيزنەسكە بار جاعدايدى جاسايمىز. الماتىدا ادال مەردىگەرلەر جۇمىس ىستەۋى كەرەك. مىندەتتەمەسىن، مەرزىمى بولسىن، ساپاسى بولسىن، ورىندامايتىن كەز كەلگەن كومپانيانى ءبىز قوشتامايمىز. اقشا تاۋىپ، "حالتۋرا" جاساعىسى كەلەتىن مەردىگەرلەر بۇل جەردە تابىس تابا المايدى. ولارعا تالاپ كۇشەيەدى. ءبىراق ادال بيزنەستى ءبىز ءاردايىم قولدايمىز»، — دەيدى قالا اكىمىنىڭ ورىنباسارى ولجاس سماعۇلوۆ.
بيىلعى 9 ايدا الماتىدا ءبىرىڭعاي ساتىپ الۋلاردى ۇيىمداستىرۋشى جالپى سوماسى 752،6 ميلليارد تەڭگەگە 1 274 بايقاۋ وتكىزگەن. ونىڭ 491 ميلليارد تەڭگەسى قۇرىلىس پەن ينفراقۇرىلىمدىق جۇمىستارعا تيەسىلى. ءبىراق مەردىگەردىڭ كەيبىرى ءىستى يگەرە الماي، تاپسىرىستى ءۇشىنشى بىرەۋگە وتكىزىپ، جۇمىسقا كەسىرىن تيگىزگەن. بيلىك مۇنداي كومپانيالاردىڭ بولاشاقتاعى بايقاۋعا قاتىسۋىنا شەكتەۋ قويىپ، باقىلاۋدى كۇشەيتە تۇسپەك.
«مىندەتىن دۇرىس ورىنداماعان مەردىگەرلەر ءبىراز اۋرەلەدى بيىل ءبىزدى. بۇعان تەندەردە كومپانيالاردىڭ جالپى تاجىريبەسى ەسكەرىلىپ، نىساننىڭ كۇردەلىلىگىن سارالاماعانى سەبەپ بولعان. بۇرىن شاعىن جۇمىس ىستەگەن كومپانيالار ۇلكەن جوبالاردى جەڭىپ الدى. مينيسترلىك كەيىن ەرەجەگە وزگەرىس ەنگىزدى: ەندى تاجىريبەگە سارالانعان ءتاسىل قولدانىلىپ، مەملەكەتتىك ساتىپ الۋعا قاتىسۋى ناقتى ەسكەرىلەتىن بولادى»، — دەدى مەملەكەتتىك اكتيۆتەر باسقارماسىنىڭ باسشىسى ەركىنبەك امىرعالييەۆ.
الماتى قالاسى قارجى مينيسترلىگىنە ءبىرقاتار ۇسىنىس جولدادى:
* قۇرىلىس جۇمىسى بويىنشا اۆانستىق تولەمدى تاپسىرىس بەرۋشىنىڭ قۇقىعى رەتىندە قاراستىرۋ (قازىرگى كەزدە بۇل مىندەتتى شارت)،
* سەنىمسىز جەتكىزۋشىنىڭ تىزىمىندە بولۋدى 2 جىلدان 3 جىلعا دەيىن ۇزارتۋ،
* ايىپپۇلدى ارتتىرۋ. قازىرگى كەزدە ايىپپۇل كولەمى تەك 0،01 % بولعاندىقتان، بۇل تيىمسىزدەۋ بولىپ تۇر. الماتى بيلىگى ونى شارت سوماسىنىڭ 25 % دەيىن ارتتىرماق ويدا.
«بيۋدجەتتىڭ ءار تەڭگەسى ءتيىمدى جۇمسالۋى ءتيىس، بۇل قاعيدا الماتىدا ناقتى جۇمىس ىستەپ تۇر»، — دەپ اتاپ ءوتتى اكىمدىك وكىلدەرى.