سەنا تەاترى العاش رەت قازاقشا قويىلىم قويدى
الماتىداعى سەنا تەاترىنىڭ رەپەرتۋارىنا تاعى ءبىر قويىلىم قوسىلدى. بۇل پوەزيالىق تۋىندىنىڭ ءجونى بولەك. تەاتر اكتەرلەرى ءوز كورەرمەنىنە العاش رەت قازاقشا سپەكتاكل ۇسىنىپ، كوپشىلىك قوشەمەتىنە بولەندى. 
«سەنى ىزدەدىم، ماحاببات» اتتى جاڭا ادەبي-سازدى قويىلىمدا اقىننىڭ قيىن تاعدىرى، العاشقى جاۋاپسىز ماحابباتى مەن شىم-شىتىرىق وقيعاسى باياندالادى. پوەزيا الەمىنىڭ تۇڭعيىعىنا سۇڭگىپ، اسەم سەزىمگە بولەنىپ، ءومىردى ءسۇيۋدى، ماحابباتتى، شىنايى سەزىمدى قادىرلەۋدى جىرلايتىن م.ماقاتايەۆ، ف.وڭعارسىنوۆا، و.سۇلەيمەنوۆ، ت. مولداعالييەۆ سىندى تانىمال اقىنداردىڭ شىعارمالارىنان قۇرالعان. سپەكتاكلدىڭ نەگىزى – اقىننىڭ ءومىرى. اقىننىڭ جان-دۇنيەسىنىڭ ارپالىسقا تۇسكەن ءساتىن كورە الاسىزدار. رەجيسسەرى – ناتاليا لۋكيانوۆا.
سەنا تەاترىندا نەبارى 15-كە جۋىق اكتەر بار. بارلىعى بىردەي كاسىبي اكتەر بولماسا دا، قويىلىمدى ءساتتى الىپ شىقتى. جوعارى دەڭگەيدە ونەر كورسەتتى.
«ءبىزدىڭ تەاتر 2020 جىلى ق ر ەڭبەك سىڭىرگەن ءارتىسى، اكتەر جانە رەجيسسەر تاحير ۆوسيلوۆتىڭ باستاماسىمەن قۇرىلدى. ول سەنا تەاترىن اشقانعا دەيىن 20 جىل ن.ساس اتىنداعى جاسوسپىرىمدەر تەاترىندا قىزمەت ەتكەن. رەجيسسەر رەتىندە دە تاجىريبەسى مول اكتەر. وسىدان 4 جىل بۇرىن جاڭا تەاتردا جاس اكتەرلەردىڭ باسىن قوسىپ، كورەرمەنگە العاشقى قويىلىمىن ۇسىندى. بارلىق قويىلىمعا تاحير ۆوسيلوۆتىڭ ءوزى رەجيسسەر بولدى. باس كەزىندە رەپەرتۋاردا 4-5 قويىلىم عانا بولاتىن. كەيبىرى كىشكەنتاي كورەرمەندەرىمىزگە ارنالدى»، – دەدى سەنا تەاترىنىڭ ديرەكتورى مەرۋەرت ەلۋبايەۆا.
تاقىرىپقا وراي
ماريا قويشىبايەۆا، ترۋپپا جەتەكشىسى، تەاتر اكتريساسى:
تەاتر تاريحىندا ەكى تىلدە بىردەي قويىلعان سپەكتاكل بولدى. ءبىراق بۇل جولى تەك قازاقشا ۇسىنىپ كورگىمىز كەلدى. قويىلىمنىڭ سەنارييى بويىنشا اقىن العاشقى ماحابباتىن ىزدەۋمەن بولادى. فرانسۋزداردا ادام ءاردايىم العاشقى ماحابباتىن ىزدەيدى دەگەن تۇسىنىك بار. مەنىڭ نەگىزگى ماماندىعىم – پسيحولوگ. پسيحولوگيادا ادامنىڭ العاشقى ماحابباتى – اناسى بولىپ سانالادى. بالكىم، سول ءبىر ىزدەگەن جاننىڭ بويىندا اناسىنىڭ بەينەسى بولۋى مۇمكىن. قويىلىم بويى كەيىپكەر العاشقى ماحابباتىن ەلەستەتۋمەن بولادى. بىردە-بىر قويىلىمدارىمىزدى جىبەرمەي كورەتىن تۇراقتى كورەرمەندەرىمىز كوپ. قازاق تىلىندە ءبىرىنشى رەت قويىپ وتىرعاندىقتان، اكتەرلەردىڭ بارىندە قوبالجۋ بار. جالپى، كەز كەلگەن اكتەرگە سەناريي بويىنشا جۇمىس ىستەگەن جەڭىلىرەك بولادى. ءبىراق بۇل جولعى سپەكتاكلدە اقىن ولەڭدەرى وقىلىپ، اندەرى شىرقالادى. 