الاتاۋ اۋدانىندا “تازا قازاقستان” باعدارلاماسىنىڭ «الماتى – ءبىزدىڭ ورتاق ءۇيىمىز» ناۋقانى اياسىندا مادەنيەت قايراتكەرلەرى مەن قالا تۇرعىندارى تازالىق جۇمىستارىنا اتسالىستى.
سەنبىلىك مومىش ۇلى مەن موڭكە بي كوشەلەرىنىڭ قيىلىسىنداعى ساياباقتا وتكىزىلدى. الاتاۋ اۋدانى اكىمدىگى كورىكتەندىرۋ ءبولىمىنىڭ باس مامانى ماديار ابۋيەۆ ءىس-شارا اياسىندا ورىندىقتار سىرلانىپ، ساياباق جانە فۋتبول الاڭىنىڭ اۋماعى قوقىستان تازالانعانىن اتاپ ءوتتى.
- «الماتى – ءبىزدىڭ ورتاق ءۇيىمىز» ناۋقانى ءوز جالعاسىن تاۋىپ جاتىر. بۇگىنگى ءىس-شاراعا مادەنيەت باسقارماسىنىڭ، سپورت باسقارماسىنىڭ جانە الاتاۋ اۋدانى اكىمدىگىنىڭ قىزمەتكەرلەرى، سونداي-اق 3 مەردىگەر مەكەمە جۇمىسشىلارى كومەگىن بەرۋدە. جالپى تازالىق جۇمىستارىنان بولەك جولعا شىعىپ تۇرعان اعاشتاردىڭ بۇتاقتارىن كەسۋ جۇمىستارى دا جۇرگىزىلۋدە، - دەدى ول.
ال ق ر ەڭبەك سىڭىرگەن قايراتكەرى قاراگوز سۇلەيمەنوۆا قالا تۇرعىندارى اراسىندا تازالىق مادەنيەتىن قالىپتاستىرۋدىڭ ماڭىزدىلىعىنا توقتالدى.
- “تازا قازاقستان” ناۋقانى ەكى جىلداي ءوتىپ جاتىر. بۇل وتە ماڭىزدى ماسەلە. ءبىز تۇرعان جەرىمىزگە، ءوتىپ جۇرگەن جولىمىزعا جاناشىرلىقپەن قاراماساق، الماتىداي كەرەمەت قالامىز قالاي گۇلدەيدى. وسىنداي باستامالار ارقىلى ءبىز ءوسىمىزدى عانا ەمەس، بالالارىمىزدى دا تاربيەلەيمىز. ءبىزدىڭ ىشكى مادەنيەتىمىز بيىك بولۋى كەرەك، - دەدى قاراگوز سۇلەيمەنوۆا.
تازالىق جۇمىستارىنا اتسالىسقان الاتاۋ ءداستۇرلى ونەر تەاترىنىڭ ءارتىسى اياۋلىم قۇنانباي قالانىڭ تازالىعى ءار ازاماتتىڭ پارىزى ەكەنىن ايتتى.
- الاتاۋ ءداستۇرلى ونەر تەاترىنىڭ ۇجىمى بولىپ موڭكە بي كوشەسىندەگى ساياباققا كەلىپ قالدىق. وسىنداي ءىس-شارالار ارقىلى ءبىز قالامىزدىڭ تازا بولۋىنا ۇلەس قوسامىز. جۇرگەن جەرىمىزدى تازا ۇستاۋ، ونى لاستاماۋ - ءاربىرىمىزدىڭ پارىزىمىز دەپ ويلايمىن، - دەدى اياۋلىم قۇنانباي.