قازاقستان پرەزيدەنتى قاسىم-جومارت توقايەۆتىڭ ۇلتتىق قۇرىلتاي وتىرىسىنداعى بايانداماسى ماڭىزدى جانە اۋقىمدى ماسەلەلەرگە ارنالدى. مەملەكەت باسشىسى سالىق رەفورماسىنان باستاپ ءبىرتۇتاس ۋاقىت بەلدەۋىنە دەيىنگى تاقىرىپتاردى قوزعاپ، سونىمەن قاتار مادەنيەت پەن ءدىن ماسەلەلەرىنە ەرەكشە نازار اۋداردى.
پرەزيدەنت قاسىم-جومارت توقايەۆ قازاقستانداعى ءدىن بوستاندىعىنىڭ كەپىلدەندىرىلگەنىن، ءبىراق تارتىپسىزدىكتىڭ جانە دەسترۋكتيۆتى ءدىني اعىمداردىڭ تارالۋىنا جول بەرىلمەيتىنىن اتاپ ءوتتى. ماجيليس دەپۋتاتى ەرمۇرات باپي، قۇرىلتاي مۇشەلەرى دانيا قىدىربايەۆا مەن ولجاس سۇلەيمەننىڭ پىكىرلەرىنە توقتالا وتىرىپ، پرەزيدەنت اسىرەسە سپورت سالاسىندا تارالىپ جاتقان زياندى ءدىني اعىمدارعا قارسى كۇش-جىگەر جۇمساۋ قاجەتتىگىن مالىمدەدى. مەملەكەت باسشىسى ەلىمىزدەگى ءدىني احۋالدىڭ تۇراقتىلىعىن ساقتاۋ ءۇشىن وسى باعىتتاعى جۇمىستى كۇشەيتۋ ماڭىزدى ەكەندىگىن ەسكەرتتى.
كاسىم-جومارت كەمەليەۆيچ ۇلتتىق سايكەستىكتى نىعايتۋدىڭ ماڭىزدىلىعىن تاعى دا اتاپ ءوتتى. ول ءۇشىن باستى ءرولدى قازاقتىڭ ەجەلگى مادەنيەتى مەن داستۇرلەرى اتقاراتىنىن ايتتى. پرەزيدەنت، سونىمەن قاتار، ناۋرىز مەرەكەسىنىڭ ۇلتتىق مادەنيەتىمىزدەگى ورنى ەرەكشە ەكەنىن اتاپ ءوتىپ، ونى جالعاستىرۋ جانە دارىپتەۋ قاجەت ەكەنىن ايتتى.
پرەزيدەنت ۇلتتىڭ وزىندىك ەرەكشەلىگىن بىلدىرەتىن ۇلتتىق كيىمدەردى قولدانۋدىڭ ماڭىزدىلىعىن دا اتاپ ءوتتى. قاسىم-جومارت توقايەۆتىڭ پىكىرىنشە، «بەت-جۇزدى جاسىراتىن قارا كيىمدەردەن گورى، ۇلتتىق ستيلدەگى كيىمدەردى كيۋ الدەقايدا دۇرىس». ۇلتتىق كيىمدەر ءبىزدىڭ ەتنيكالىق سايكەستىگىمىزدى ايقىن كورسەتەدى جانە ونى كەڭىنەن ناسيحاتتاۋ كەرەك دەپ اتاپ ءوتتى.
قاسىم-جومارت توقايەۆتىڭ بايانداماسىنان قازاقستاندا ۇلتتىق مادەنيەتتى دامىتۋدى، ۇلتتىق سانانى نىعايتۋدى جانە دەسترۋكتيۆتى ءدىني اعىمدارعا قارسى كۇرەستى ودان ءارى كۇشەيتۋدى كوزدەيتىن ساياسي باعىتتىڭ جالعاسىپ وتىرعانىن بايقاۋعا بولادى. مەملەكەت باسشىسى ۇلتتىق بىرەگەيلىكتى قورعاۋ مەن ساقتاۋ ماسەلەسىندە ناقتى قادامدار جاساپ، قوعامدى تارتىپكە شاقىرۋدى ماقسات ەتۋدە، دەپ جازدى ءدىنتانۋشى ءال-فارابي بولاتجان.