دەنساۋلىق ساقتاۋعا بولىنەتىن قارجى كولەمى دە ۇلعايا بەرەدى.
سەنات سپيكەرى ماۋلەن اشىمبايەۆ باستاعان پالاتا دەپۋتاتتارى ەلورداداعى ۇلتتىق نەيروحيرۋرگيا ورتالىعىنا بارىپ، مەديسينالىق نىساننىڭ نەگىزگى قۇرىلىمدارىنىڭ جۇمىسىمەن تانىستى، دەپ حابارلايدى Almaty-akshamy.kz.
ماۋلەن اشىمبايەۆ قازاقستاندىقتاردىڭ دەنساۋلىعىن جاقسارتۋدا، دەنساۋلىق ساقتاۋدىڭ ساپاسى مەن قولجەتىمدىلىگىن ارتتىرۋدا ۇلتتىق نەيروحيرۋرگيا ورتالىعىنىڭ ءرولى زور ەكەنىن ايتتى. بۇل سالا مەملەكەتىمىزدىڭ الەۋمەتتىك ساياساتىنىڭ ماڭىزدى بولىگى ەكەنى بەلگىلى.
سەنات ءتوراعاسى الداعى ۋاقىتتا ەلىمىزدە وسى سالانى دامىتۋ جۇمىستارى ودان ءارى جالعاسا بەرەتىنىن جانە مەديسينالىق قىزمەتكەرلەردى قولداۋ ءۇشىن بارلىق ءتيىستى شارالار قولعا الىناتىنىن اتاپ ءوتتى.
«مەملەكەت باسشىسى دەنساۋلىق ساقتاۋ سالاسىنا ۇنەمى باسا ءمان بەرىپ كەلەدى. دەنساۋلىق ساقتاۋعا بولىنەتىن قارجى كولەمى دە ۇلعايا بەرەدى. مىندەتتى الەۋمەتتىك مەديسينالىق ساقتاندىرۋ جۇيەسى جەتىلدىرىلەدى. قازىرگى تاڭدا حالىق تاراپىنان اتالعان ساقتاندىرۋ جۇيەسىنە قاتىستى ءتۇرلى سىني پىكىرلەر ءجيى ايتىلىپ ءجۇر جانە ولار نەگىزسىز ەمەس. بۇگىندە 3 ملن-عا جۋىق ازاماتىمىز مەديسينالىق ساقتاندىرۋدان تىس قالىپ وتىر. سونداي-اق الداعى ۋاقىتتا دارىگەر مارتەبەسى زاڭمەن بەكىتىلەدى. مەديسينالىق قىزمەتكەرلەردى قورعاۋ جانە قولداۋ شارالارى كۇشەيىپ، ماماندىقتىڭ مارتەبەسى ارتا تۇسەدى. مەملەكەت باسشىسىنىڭ تاپسىرماسىمەن جىل سايىن مەديسينالىق قىزمەتكەرلەردىڭ جالاقىسىن ۇلعايتۋعا قاتىستى شارالار قابىلدانىپ جاتىر»، – دەدى ماۋلەن اشىمبايەۆ.
اتالعان ءىس-شارا بارىسىندا سەناتورلارعا راديولوگيا جانە راديوحيرۋرگيا بولىمشەسىنىڭ جۇمىسى تۋرالى مالىمەتتەر بەرىلدى. مۇندا زاماناۋي «گامما-پىشاق» كەشەنى ورناتىلعان. ول كۇردەلى نەيروحيرۋرگيالىق وتا جاساۋعا مۇمكىندىك بەرەدى.
ورتالىق ءتوراعاسى سەرىك اقشولاقوۆتىڭ ايتۋىنشا، «گامما-پىشاق» ىسىكتەردى، قان تامىرلارى مەن فۋنكسيونالدىق مي اۋرۋلارىن ەمدەۋ ءۇشىن قولدانىلادى. بۇل جاعدايدا ميدىڭ ساۋ تىندەرى جانە ناۋقاستىڭ بۇكىل دەنەسى ساۋلەلەنبەيدى. سونىمەن قاتار دەپۋتاتتارعا گوسپيتالدىق فارماسيا بولىمشەسىنىڭ قىزمەتى تانىستىرىلدى. وندا ەمدەۋدىڭ تيىمدىلىگىن جانە دارىلىك زاتتاردى پايدالانۋدىڭ ۇتىمدىلىعىن ارتتىرۋعا مۇمكىندىك بەرەتىن تەحنولوگيالار بار.
كەزدەسۋگە الەۋمەتتىك-مادەني دامۋ جانە عىلىم كوميتەتىنىڭ مۇشەلەرى اقمارال ءالنازاروۆا جانە باقىتجان جۇماعۇلوۆ، ەلىمىزدىڭ دەنساۋلىق ساقتاۋ ءمينيسترى اجار عينيات، سونداي-اق ورتالىقتىڭ قىزمەتكەرلەرى قاتىستى.