قورعانىس ونەركاسىبى كەشەنىندەگى كاسىپورىنداردى جەكەشەلەندىرۋ مەملەكەت ءۇشىن ءقاۋىپتى سالدارعا اكەلۋى مۇمكىن. سەناتور گەنناديي شيپوۆسكيح ءوزىنىڭ دەپۋتاتتىق ساۋالىندا وسى ماسەلەگە وراي پىكىرىن ايتتى، دەپ حابارلايدى Almaty-akshamy.kz.
دەپۋتات تاۋەلسىزدىك جىلدارىندا وسى ماڭىزدى سالادا ءبىرقاتار وزگەرىستەر ورىن العانىن اتاپ ءوتتى. قورعانىس ونەركاسىبى كەشەنىنە جاتاتىن كاسىپورىنداردىڭ كوپشىلىگى بۇگىندە جەكەشەلەنىپ كەتكەن جانە جەكەمەنشىكتە قالىپ وتىر.
«قازىرگى كەزدە وتاندىق قورعانىس ونەركاسىبى كەشەنىنىڭ وزەگى سانالاتىن «قازاقستان ينجينيرينگ» ۇلتتىق كومپانياسى» اكسيونەرلىك قوعامى اكتيۆتەرىنىڭ قۇرىلىمىنا 15 كاسىپورىن كىرىپ تۇر. ونىڭ ىشىندە «جەكەشەلەندىرۋدىڭ 2021-2025 جىلدارعا ارنالعان كەيبىر ماسەلەلەرى تۋرالى» ۇكىمەتتىڭ قاۋلىسىنا سايكەس، 4 اكتيۆتى ساتۋ كوزدەلىپ وتىر، سونىڭ بىرەۋى «تىنىس» اكسيونەرلىك قوعامى بيىل مامىر ايىندا ساتىلىپ كەتتى»، - دەدى سەناتور ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
دەپۋتات ول ساتىلعاننان كەيىن «قازاقستان ينجينيرينگى» قارۋلى كۇشتەردى بارىنشا سۇرانىسى بار قارۋ-جاراقپەن جانە اسكەري تەحنيكامەن تولىق قامتاماسىز ەتە الماي قالۋى مۇمكىن ەكەنىن ايتتى، -دەپ جازدى قازاقپارات
«بۇل سالاداعى كاسىپورىنداردى جەكەشەلەندىرۋدەن ءتيىستى ءقاۋىپ بار. ياعني مەملەكەت جاعىنان جەكەمەنشىك قورعانىس ونەركاسىبىن قاداعالاۋ مۇمكىندىگىنىڭ ازايۋى، قورعانىس ونەركاسىبىنە شەتەلدىك ينۆەستورلاردىڭ قاتىسۋى بولاشاقتا ونىڭ قىزمەتىن مەملەكەتكە قارسى پايدالانىلمايتىنا كەپىلدىكتىڭ بولماۋى، سوعىس جاعدايىندا قورعانىس ونەركاسىبىنەن ايىرىلىپ قالۋ جاعدايىنا اكەلۋى مۇمكىن. بۇل رەتتە جەكەشەلەنگەن مۇلىك تىستەگەننىڭ اۋىزىندا، ۇستاعاننىڭ قولىندا كەتپەس ءۇشىن قازاقستان رەسپۋبليكاسىنىڭ ۇلتتىق قاۋىپسىزدىگىنىڭ جاي-كۇيىنە اسەر ەتەتىن وبەكتىلەردى جەكەشەلەندىرۋگە جول بەرىلمەۋىن تالاپ ەتەمىز»،-دەدى سەناتور.