بۇگىن سەناتتىڭ جالپى وتىرىسىندا دەپۋتات اندرەي لۋكين الماتىنىڭ تاۋلى جەرلەرىندەگى زاڭسىز قۇرىلىس پەن الما باقتارىنىڭ جويىلۋىنا قاتىستى ماسەلەنى كوتەردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«قوعام بەلسەندىلەرى، ەكولوگتار، سەيسمولوگ ماماندار، زاڭگەرلەر جانە قالا تۇرعىندارى كۇردەلى ماسەلەگە نازار اۋدارۋدى تالاپ ەتىپ وتىر. قورشاعان ورتاعا زالال كەلتىرىلىپ جاتىر. وسىنىڭ سالدارى تۇرعىنداردىڭ ومىرىنە ەلەۋلى ءقاۋىپ توندىرەدى»، - دەدى اندرەي لۋكين پرەمەر-مينيستر مەن باس پروكۋروردىڭ اتىنا جولداعان دەپۋتاتتىق ساۋالىندا.
ونىڭ ايتۋىنشا، كەيىنگى ونجىلدىقتا تاۋ جانە تاۋ ەتەگىنىڭ بولىگىندە قارقىندى قۇرىلىس ءجۇرىپ جاتىر.
«جەكە قۇرىلىس كومپانيالارى كاسىپكەرلىكتى تەكسەرۋگە موراتوريي جاريالانۋىن جامىلىپ، جەر تەلىمدەرىنىڭ نىسانالى ماقساتىن شارۋا قوجالىعى نەمەسە باۋ-باقشا شارۋاشىلىعىنان جەكە تۇرعىن ءۇي قۇرىلىسىنا اۋىستىرىپ، كەيىن تاۋ ەتەگىنە جاقىن جەرلەردە كوپ قاباتتى تۇرعىن ءۇي كەشەندەرىن سالىپ جاتىر. توتەنشە جاعدايلار مينيسترلىگى بۇل اۋماقتارداعى قۇرىلىستار تەحنوگەندىك سيپاتتاعى جەر قاباتىنىڭ كوشكىنىنە اكەلۋى مۇمكىن ەكەنىن بىرنەشە رەت مالىمدەدى. ويتكەنى مۇنداي اۋماقتار كۇردەلى قۇرىلىسقا جارامايدى»، - دەدى سەناتور.
وسى ورايدا ول اتالعان جەرلەردى راسىمدەۋگە قاتىستى ءتۇرلى جارنامالار دا جاريالانىپ جاتقانىن ايتتى.
اندرەي لۋكين ۇكىمەتكە الماتى قالاسىنىڭ تاۋلى جانە الماتى وبلىسىنىڭ الماتىعا جاقىن اۋداندارىنىڭ جەرلەرىنە ەگجەي-تەگجەيلى تۇگەندەۋ جۇرگىزۋدى ۇسىندى.
ونىڭ پايىمىنشا، قولدانىستاعى زاڭناماعا اتالعان جەرلەردە جەكە قۇرىلىس سالۋعا تولىق تىيىم سالۋدى ەسكەرەتىن وزگەرىستەر ەنگىزۋ كەرەك. بۇدان بولەك، ءتيىستى نورماتيۆتىك-قۇقىقتىق اكتىنى قابىلداعانعا دەيىن جەر تەلىمىن بولۋگە موراتوريي جاريالاۋ قاجەت.