پرەزيدەنتتىڭ سوزىنە توقتاپ، قولداۋىمىز كەرەك
ق ر پارلامەنتى سەناتىنىڭ دەپۋتاتى دۇيسەنعازى مۋسين بارشا قازاقستاندىقتاردى ەل پرەزيدەنتىن قولداۋعا شاقىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى ق ر پارلامەنت سەناتىنىڭ باسپا ءسوز قىزمەتى ءمالىم ەتتى.
«اتا-بابامىزدىڭ ارمانى بولعان، عاسىرلار بويى ارمانداعان، قولىمىز جەتكەن تاۋەلسىزدىكتى قورعاۋ بۇگىنگى قالىپتاسىپ وتىرعان جاعدايدا وتە ماڭىزدى. قوعامنىڭ ءار مۇشەسى، قازاقستاننىڭ ءار پاتريوتى، «مەن قازاقپىن، مەن قازاقستاندىقپىن» دەگەن ازاماتتىڭ بۇگىنگى بورىشى – وسى ەلىمىزدەگى تىنىشتىقتى ساقتاپ قالۋ. مەملەكەت باسشىسىنىڭ تاراپىنان قابىلدانىپ جاتقان شۇعىل شارالار حالىقتىڭ ويىنان شىعىپ، ءقازىر كۇشتىك قۇرامداردىڭ تاراپىنان، وڭىرلەردە قابىلدانىپ جاتقان شارالار ەلىمىزدەگى جاعدايدى جالپى تۇراقتاندىردى دەپ ايتا الامىز. سوندىقتان بارشا وتانداستارىمىزعا، بارشا قازاقستاندىقتارعا ايتارىمىز، وسىنداي سىن-ساعاتتاردا ءبىر اۋىزدى بولىپ، مەملەكەت باسشىسىنىڭ قولعا الىپ جاتقان ءىس-شارالارىن قولداپ، مەملەكەتتىڭ تاۋەلسىزدىگى ءۇشىن، ۇرپاقتارىمىزدىڭ، بالا-شاعامىزدىڭ، نەمەرەلەرىمىزدىڭ بولاشاعى ءۇشىن، ەلىمىزدىڭ تاۋەلسىزدىگى ءۇشىن ايانباي جۇمىس جاساۋ كەرەك دەپ ويلايمىن، سوعان شاقىرامىن»، - دەلىنگەن سەناتتىڭ باسپا ءسوز قىزمەتى ۇسىنعان حابارلامادا.
ساياساتتانۋشى راسۋل جۇمالى دا ق ر پرەزيدەنتى قاسىم-جومارت توقايەۆ ەلدەگى جاعدايعا بايلانىستى قازاقستان حالقىنا جولداعان ۇندەۋىنە وراي پىكىر بىلدىرگەن بولاتىن.
«پرەزيدەنتتىڭ سوزىنە توقتاپ، قولداۋىمىز كەرەك. ەلىمىزدەگى ەڭ باتىل، ەڭ ساپالى شەشىم قابىلدايتىن ءبىر عانا ينستيتۋت قالدى ءقازىر. ول – پرەزيدەنت. پرەزيدەنتتىڭ جانىنا توپتاسۋىمىز كەرەك. قاجەت بولسا، قولىمىزعا قارۋ الىپ ءبىز دە كوشەگە شىعۋعا ءازىرمىز. ەلىمىزدە تارتىپكە قارسى، مەملەكەتكە قارسى، كونستيتۋسيالىق باعىتقا قارسى شىعىپ جاتقان ازاماتتار وزدەرىن كوپشىلىكپىز دەپ ويلاماسىن. كوپشىلىك – ءبىزبىز. جاعدايدىڭ قالاي بولاتىنىن ءبىز شەشەمىز. سونى ەسكەرسىن»، - دەدى ساراپشى.