قالاداعى 15 ءدارىحانا بۇزاقىلىق كەزىندە زارداپ شەككەن
الماتىدا ءبىرىنشى قاجەتتىلىك نىساندارىنىڭ جۇمىسى قايتا جاندانا باستادى. بۇل تۋرالى الماتى قالاسى كاسىپكەرلىك جانە ينۆەستيسيا باسقارماسىنىڭ باسپا ءسوز حاتشىسى انار تاستانبەكوۆا ايتىپ بەردى، دەپ جازدى Baq.kz.
ونىڭ ايتۋىنشا، قالادا، اسىرەسە، ءىرى ساۋدا جەلىلەرىنىڭ جۇمىسى قايتا ىسكە قوسىلا باستاعان. كەشە قالانىڭ بارلىق اۋداندارىندا ماگنۋم، تويمارت، سمول سۋپەرماركەتتەرىنىڭ 28 فيليالى اشىلعان. بۇگىن ولاردىڭ 49 فيليالى ىسكە قوسىلدى، اتاپ ايتقاندا، ماگنۋمنىڭ 39، سمولدىڭ 9، تويمارتتىڭ 1 فيليالى.
ونىڭ ايتۋىنشا، قالاداعى ديستريبيۋتورلاردىڭ قورلارىندا ازىق-تۇلىك جەتكىلىكتى كولەمدە ساقتالعان. تۇرعىندارعا الاڭداۋعا نەگىز جوق.
«تاماق ونەركىسىبى سالاسىنداعى ءىرى كاسىپورىنداردىڭ جۇمىسى توقتاعان جوق. «اقساي نان» جانە باسقا دا زاۋىتتار قالىپتى جاعدايدا جۇمىس ىستەپ تۇر. سونداي-اق، بۇگىننەن باستاپ «بارىس»، «الماتى-1» جانە «ارىستان» بازارلارى جۇمىسىن قايتا باستادى. ودان بولەك، قالا بويىنشا 44 جانارماي بەكەتى جۇمىس ىستەپ تۇر. الداعى ۋاقىتتا تاعى 25 جانارماي بەكەتى اشىلادى. ال، جانارماي مەن ديزەل وتىنىنىڭ باعاسى بۇرىنعى دەڭگەيدە ساقتالعان. سۇيىلتىلعان گازدىڭ ءليترى 70 تەڭگەگە دەيىن تومەندەتىلدى»، - دەدى ول.
ا. تاستانبەكوۆا سونىمەن قاتار قالادا 900 ءدارىحانا بارىن جانە ونىڭ 200-دەن استامى جەلىلىك ەكەنىن جەتكىزدى.
«ءقازىر قالا اۋماعىندا 70 جەلىلىك جانە 40 بولشەك ساۋدا ءدارىحانالارى جۇمىس ىستەپ جاتىر. ونىڭ ىشىندە 102 ءدارىحانا ساعات 08.00-دەن 19.00-گە دەيىن، 3 ءدارىحانا تاۋلىك بويى جۇمىس ىستەيدى. سوڭعى مالىمەتتەرگە سايكەس، 15 ءدارىحانا بۇزاقىلىق كەزىندە زارداپ شەككەن»، - دەدى ول.