ادىلەتتى قوعام قۇرۋ - بۇگىنگى قازاق قوعامىنىڭ باستى قۇندىلىعى. مەملەكەت باسشىسى قاسىم-جومارت توقايەۆتىڭ سوڭعى ءۇش جىلداعى قازاقستان حالقىنا جولداۋلارىنىڭ يدەيالىق ءتۇپقازىعى – ادىلەتتى قازاقستان قۇرۋ ستراتەگياسىنا باعىشتالدى.
بۇل ساياسي دا تاريحي قۇجاتتا: «ازاماتتارى، اسىرەسە جاستارى مادەنيەتتى، جاڭاشىل ءارى جاسامپاز ۇلتتىڭ ۇپايى تۇگەل. سوندىقتان ءبىز وركەنيەتتى ەل بولۋعا كەدەرگى جاسايتىن جاعىمسىز ادەتتەردەن ارىلۋىمىز كەرەك»-دەلىنگەن.
وسى ورايدا Narxoz ۋنيۆەرسيتەتى قۇقىق جانە مەملەكەتتىك باسقارۋ مەكتەبى ستۋدەنتتەرىنە قازاقستان رەسپۋبليكاسى پارلامەنتى سەناتى ءتوراعاسىنىڭ ورىنباسارى، 2-سىنىپتى مەملەكەتتىك ادىلەت كەڭەسشىسى، زاڭ عىلىمدارىنىڭ كانديداتى جاقىپ قاجمان ۇلى اسانوۆتىڭ وقىعان قوناق ءدارىسى ءوتتى. جاستاردىڭ ساياسي مادەنيەتى مەن قۇقىقتىق، فيلوسوفيالىق كوزقاراستارىن قالىپتاستىرۋعا ىقپال ەتكەن ءدارىستىڭ بەرەر ءبىلىمى، كوتەتەر جۇگى سالماقتى.
سەناتور ج.ق. اسانوۆ: «الەم قارقىندى وزگەرۋدە، جانە مەملەكەتتىك باسقارۋ بۇل وزگەرىستەرگە سايكەس كەلىپ قانا قويماي، ولاردان وزىق بولۋى قاجەت»، - دەيدى. سپيكەر زاڭ سالاسىنداعى ەڭ العاش تاجىريبەسىنەن باستاپ، تولىسقا، ورنىققان كەمەل جاسقا دەيىنگى كاسىبي پورتفوليوسىن ءبىلىم، بىلىك جانە داعدى اتتى ۇشتاعانعا توعىستىرا كەلە، وسى قاسيەتتەردىڭ ءبارى ىزگىلىك پەن ادامگەرشىلىك ءادىل تارازىسىنان ەلەپ، ەكشەپ، پايىمداپ بارىپ شەشىم شىعارۋدا دەپ اتادى.
دارىسكە تيەك بولعان تەزيس - جاس ادامنىڭ ومىرلىك ماقساتى مەن بولاشاق قىزمەت تراەكتورياسىن سانالى تۇردە سارالاپ، تالعاپ، ءوزىنىڭ مۇمكىندىكتەرى مەن قارىم-قابىلەتىن باعىتتاۋ.
بۇل تۇرعىدا، ساليقالى دا سارابدال زاڭگەر ناعىز كوشباسشى – تەك پروسەستى جانە ادامداردى باسقاراتىن ادام عانا ەمەس، ەڭ الدىمەن، ءوزىن-وزى باسقارىپ، بولاشاقتى قۇرا الاتىن تۇلعا دەپ تانيدى.
ءدارىسءتى تىڭداعان بولاشاق زاڭگەر، ساياساتكەر، ديپلومات ماماندارى رۋحتانىپ، دارىسكەردىڭ سۇراقتارىنا جارىسا جاۋاپ بەرىپ، وزدەرى قىزىعى سۇراقتار قويىپ، ينتەراكتيۆتى قالىپتا ءوربىدى.
قازىرگى مەملەكەتتىك باسقارۋ ءبىرقاتار سىن-تەگەۋرىندەرمەن بەتپە-بەت كەلۋدە دەپ اتاپ وتكەن سپيكەر بىرنەشە تۇجىرىمدار ۇسىندى. سونىڭ ىشىندە، مەملەكەتتىك ورگانداردىڭ جۇمىس تيىمدىلىگىن ارتتىرۋ، سيفرلىق تەحنولوگيالاردى ەنگىزۋ، حالىقپەن ءوزارا ءىس-قيمىلدى جاقسارتۋ جانە شەشىم قابىلداۋ ۇدەرىسىنىڭ اشىقتىعىن قامتاماسىز ەتۋ ماسەلەلەرى ەرەكشە ورىن الادى. بۇگىنگى تاڭدا مەملەكەتتىك مەنەدجمەنت مامانداردان باسقارۋدىڭ زاماناۋي قۇرالدارى، تابىستى تاجىريبەلەرى مەن تۇراقتى مەملەكەتتىك ينستيتۋتتاردى دامىتۋعا ىقپال ەتەتىن ستراتەگيالىق تاسىلدەر تۋرالى تەرەڭ ءبىلىمدى تالاپ ەتەدى.
ءدارىستى تىڭداعان ستۋدەنتتەردىڭ ءبىرى حاسانوۆا ينديرا: ءوتە پايدالى، اقپاراتقا تولى جانە قىزىقتى ءدارىس بولدى. سپيكەردىڭ كۇردەلى جاعدايلاردى قاراپايىم ءتۇسىندىرىپ، ونى كۇندەلىكتى ءومىردىڭ ءبىر بولىگى رەتىندە ايتۋى ۇنادى. بىزگە ۇسىنعان ءۇش قاعيدا سونشالىقتى قيىن ەمەس، ءبىراق وعان ءتوزىم، ءبىلىم ءجان ىزدەنىس كەرەك. ماسەلەن، جاڭا ءىستءى باستاعاندا تەك قانا ءبىر عانا ەڭ ماڭىزدىسىنا فوكۋس قويۋ. ءوز ورتاڭنان كاسىبىن ادال يگەرگەن مامانداردى قولداپ، كوماندالىق جۇمىستارعا جۇمىلدىرا ءبىلۋ. سونداي-اق وزات قۇرالدار مەن تەحنولوگيالاردى ۇيرەنۋ جانە ءتيىمدى پايدالانا الۋ.
بۇل ويلار مەنىڭ وقۋ مەن جۇمىسقا دەگەن كوزقاراسىمدى وزگەرتتى. ەندى مەن باستى نارسەگە نازار اۋدارۋ قاعيداسىن كۇندەلىكتى ومىرىمدە قولدانعىم كەلەدى، سونداي-اق مۇمكىندىكتەر مەن ادامدارعا مۇقيات بولۋدى ۇيرەنۋىم قاجەت، - دەيدى.
ال ستۋدەنت قۇرمانقۇلوۆا ءاسەل دارىستەن العان اسەرىن سپيكەردىڭ بويىنان تاباندىلىق پەن ۇزدىكسىز ءبىلىم الۋدىڭ ەڭ وزات ۇلگىسى مەن مىقتى باسشىنىڭ بولمىسىن تانىدىم دەيدى. اسىرەسە، ج. اسانوۆتىڭ سوت جۇيەسىندەگى ءتيىمدى جۇرگىزگەن رەفورمالارى مەن ءۇشىن تەرەڭ زەرتتەيتىن كەيس بولدى. سونداي-اق، قىلمىستىق جازالاردى ىزگىلەندىرۋ مەن تۇرمە تۇرعىندارىنىڭ سانىن ازايتۋداعى تاجىريبەسىن كوپ جاستار وقىپ، بىلسە ەكەن. بۇل قوعامداعى الەۋمەتتىك ادىلەتتىلىكتىڭ كورىنىسى ءارى ناتيجەسى.
جاقىپ اسانوۆتىڭ ءدارىسى ستۋدەنتتەرگە، وقىتۋشى، پروفەسسورلارعا قۇقىقتىق جۇيە، باسقارۋ جانە رەفورمالار تۋرالى تەرەڭ تۇسىنىك بەرىپ، ولاردىڭ بولاشاق كاسىبي دامۋىنا قۇندى ۇلەس قوستى.